टीओआरमा फेरि पनि जुटेन कार्यदलमा सहमति
काठमाडौं । सहकारीको रकम ठगी छानबिन गर्न गठन गर्ने भनिएको संसदीय समितिको कार्यादेश (टीओआर) टुंगो लगाउन बसेको कार्यदलको बैठक आज (शुक्रबार) पनि निष्कर्षविहीन भएको छ ।
कानुन मन्त्रालयमा विहानैदेखि बसेको कार्यदलको बैठकमा सहमति नजुटे पनि छलफल सकारात्मक भएको एमालेका प्रमुख सचेतक महेश बर्तौलाले जानकारी दिएका छन् । आज कांग्रेस थप लचक भएर आएको जानकारी दिंदै उनले भने, ‘उहाँहरूले गृहमन्त्रीको नाम नराख्ने भए उहाँ संलग्न भएको संस्थाहरूको नाम राखेर जाऔं भन्ने ढंगको प्रस्ताव ल्याउनु भएको छ । त्यसबारेमा हामी दुवै छलफल गरेर फेरि बस्ने कुरा भएको छ ।’
‘कांग्रेसका तर्फबाट नयाँ प्रस्ताव आयो तर छलफल जारी नै छ टुंगिएको छैन । पुनः छलफलका लागि केही समयपछि बस्छौ । त्यस्तै पर्दा संसद् भवनमा पनि बस्छौ’, बर्तौलाले भने ।
