यसो भनिन् सुष्मा स्वराजले प्रचण्डलाई
काठमाण्डौं, १९ माघ : भारतीय विदेशमन्त्री सुष्मा स्वराजले नेकपा माओवादी केन्द्रका अध्यक्ष पुष्पकमल दाहाल प्रचण्डलाई शुक्रबार भेटेकी छन् ।
स्वराजसँगको भेटपछि प्रतिक्रिया दिंदै दाहालले अहिले उनको भ्रमण एक सद्भाव भ्रमणको रुपमा आफूले बुझेको बताएका छन् । प्रचण्डले चुनावपछिको नेपालको परिस्थिति र सरकार गठनको तयारीका बारेमा विदेशमन्त्री स्वराजले जिज्ञासा राखेको बताएका छन् । नेपालको भावी राजनीति कसरी अघि बढ्ला भनी जिज्ञासा राखेको र निर्वाचनमा विजयी भएकोमा बधाई शुभकामना दिएको बताए ।
आफूले नेपालका लागि राजनीतिक स्थायीत्व र विकास आवश्यक रहेको र मुख्य गरी दुई देशबीचको सहयोग र सद्भावका बारेमा नै कुराकानी भएको प्रष्ट्याएका छन् । नेपालको राजनीतिक स्थायीत्व र विकासका लागि भारतको सधैं सहयोग रहने प्रतिवद्धता जनाएको दाहालले बताएका छन् । पूर्व निर्धारित कार्यक्रम अनुसार सोल्टी होटलमा शुक्रबार बिहान ९ः४० देखि साढे १० बजेसम्म स्वराज र प्रचण्डबीच भेतवार्ता भएको प्रचण्डका प्रेस संयोजक मनहरि तिमिल्सिनाले बताएका छन् ।
विदेशमन्त्री स्वराजले शुक्रबार नै राष्ट्रपति विद्यादेवी भण्डारी र प्रधानमन्त्रीसहित कांग्रेस नेतासँग भेटवार्ता गर्ने कार्यक्रम रहेको छ । उनी आजै अपरान्ह भारत फर्किने छिन् । बिहीबार दिउँसो काठमाण्डौं आएकी स्वराजले भावी प्रधानमन्त्रीको मुख्य दावेदार रहेका एमाले अध्यक्ष केपी ओलीसँग एकल र एमाले नेतासहित संयुक्त भेटवार्ता गरेकी थिइन् । उनले मधेसी दलका नेताहरुसँग पनि समसामयिक राजनीतिक अवस्थाका बारेमा जानकारी लिएकी थिइन् ।