सर्वोच्चद्वारा जनयुद्ध दिवसको बिदाविरुद्ध परेको रिट दर्ता गर्न अस्वीकार
काठमाडौं । नेपाल सरकारले जनयुद्ध दिवसको अवसरमा सार्वजनिक बिदा दिएको भन्दै दर्ता गरिएको रिट सर्वोच्च अदालतले दरपीठ (अस्वीकार) गरेको छ ।
सरकारले आगामी वर्षको सार्वजनिक बिदामा जनयुद्ध दिवससहित पृथ्वी जयन्तीलाई बिदाको रूपमा थप गरेको छ । सरकारको निर्णय द्वन्द्वपीडितहरू त्यसविरुद्ध रिट लिएर आइतबार सर्वोच्च पुगेका थिए ।
ज्ञानेन्द्र राज आरणसहित कल्याण बुढाथोकी, रिता कार्की, गंगामाया अधिकारी, पूर्णप्रसाद पौडेललगायतले रिट दर्ता गर्न सर्वोच्च पुगेका थिए । उनीहरूले अदालतका सह–रजिस्ट्रार विमल पौडेललाई भेटेर रिट दर्ताको फाइल छोडेर गएका छन् । रिट दर्ताको फाइल अध्ययनमा नै रहेकाले आइतबार रिट दर्ता भएको थिएन । सोमबार अध्ययनपछि रजिस्ट्रार नारायणप्रसाद पन्थीले रिट दरपीठ गर्ने निर्णय गरेका हुन् ।
