इलाम पुगेर सुहाङ नेम्वाङले भने, ‘राजनीतिक परिवारमा जन्मेकै कारण अवसर पाउनु पर्छ भन्दिनँ’
‘बुबाको सपना पूरा गर्न लागिरहन्छु’
इलाम । संविधानसभा अध्यक्ष स्व. सुवास नेम्वाङका कान्छा छोरा सुहाङ नेम्वाङले आफू बुबाको सपना पूरा गर्न लागिरहने बताएका छन् । राजनीतिमा अवसर पाउनुपर्छ भनेर आफूले नठानेको बताएका सुहाङले बुबाको सपना पूरा गर्न भने लागिरहने बताएका हुन् ।
मंगलबार एमाले इलामले आयोजना गरेको श्रद्धाञ्जली सभामा सुहाङले आफ्ना बुबा सधैँ लोकतन्त्र र बहुदलीय प्रतिस्पर्धाको हिमायती भएको स्मरण गरे । स्व. नेम्वाङले सधैँ लोकतन्त्र, संविधान र कानुनको शासन मजबुत होस् भन्ने चाहेको सुहाङले बताए ।
आफ्ना बुबाको मृत्युपछि आर्यघाटसम्मको व्यवस्थापनका लागि एमाले अध्यक्ष केपी शर्मा ओली र राजकीय सम्मानका लागि सरकारलाई उनले धन्यवाद समेत दिए । राजनीतिक परिवारमा जन्मेकै कारण अवसर पाउनु पर्छ भनेर आफूले नसोच्ने सुहाङको भनाइ छ । तर, बुबाको सपना पूरा गर्न भने लागिरहने उनले बताएका छन् ।
