कालापानी क्षेत्र भारतको भएको सन्देश दिने गरी नरेन्द्र मोदी नेपाली भूमिमा, नेपाल सरकार बेखबर
काठमाडौं : भारतीय प्रधानमन्त्री नरेन्द्र मोदीले विहिबार नेपाली भूमी दार्चुलाको कालापानी– लिम्पियाधुरा क्षेत्रको विभिन्न कार्यक्रममा सहभागी भए । कालापानी– लिम्पियाधुरा क्षेत्रका स्थानीय वासिन्दासँग संवाद गरे, सुरक्षाकर्मीहरुसँग अन्तरक्रिया गरे, मन्दिरको दर्शन गरे ।
नेपाली भूमि कालापानी– लिम्पियाधुरा क्षेत्रमा खिचिएको आफ्नो तस्बीर पोष्ट गर्दै विहिबार साझ लेखेका छन्, ‘उत्तराखण्डको पिथौरागढको पवित्र पार्वती कुण्डमा दर्शन र पूजा गर्दा म अभिभूत छु। यहाँबाट आदि कैलाशको दर्शन गर्दा मन पनि हर्षित हुन्छ । प्रकृतिको काखमा अवस्थित यस अध्यात्म र संस्कृतिको ठाँउबाट यहाँका परिवारजनको सुखमय जीवनको कामना ।’
प्रधानमन्त्रीले मोदीले आफ्नो भूमी भएको सन्देश दिने गरी राखेका यी क्षेत्रहरुलाई नेपालले औपचारिक रुपमा आफ्नो नक्सामा समेटेको छ । नेपालले सन् १८१६ को सुगौली सन्धिका आधारमा महाकाली नदीको पूर्वी भागमा पर्ने लिम्पियाधुरा, कालापानी र लिपुलेकसहित सबै क्षेत्र नेपालको भूभाग रहेको भन्दै नक्सा जारी गरेको छ । जारी नयाँ नक्सामा गुन्जी, नाभी र कुटी गाउँ समेटिएको छ । प्रधानमन्त्री मोदीले विहिबार आज यही क्षेत्रमा भ्रमण गरेका हुन् ।
भारतीय प्रधानमन्त्री मोदीले विहिबार पार्वतीकुण्डमा पूजा गर्ने र गुन्जी गाउँका बासिन्दाहरूसँग अन्तरक्रिया गर्ने तथा स्थानीय उत्पादनहरूको प्रदर्शनी अवलोकन गरेका छन् । तर नेपाली भूमीमा भारतीय प्रधानमन्त्री मोदीले भ्रमण गर्दा नेपाल सरकार भने बेखबर रहेको पाइएको छ । यस क्षेत्रमा भारतीय प्रधानमन्त्रीको भ्रमणबारे भारतले नेपाललाई औपचारिक जानकारी नगराएको परराष्ट्र मन्त्रालयका उच्च अधिकारीहरुको भनाई छ ।
दार्चुला जिल्लाकी प्रमुख जिल्ला अधिकारी किरण जोशीले भारतीय पक्षले उक्त भ्रमणबारे केही जानकारी नदिएको स्थानीय सञ्चार माध्यमहरुलाई जानकारी दिएका छन् ।
प्रधानमन्त्री मोदीले गुन्जीमा तिब्बतसँगको सीमामा खटिएका भारतीय सैनिकहरू र सीमामा सडक निर्माणमा संलग्न निकायका अधिकारीहरूसँग पनि अन्तरक्रिया गरेको तस्बिरहरु सामाजिक सञ्जालमा राखेका छन् ।