अब टेलिकमको उच्च गतिको ‘ब्रोड व्याण्ड’ इन्टरनेट
काठमाडौं, २८ साउन । नेपाल टेलिकमले चालु आर्थिक वर्षभित्रै ३ हजार किलोमिटर क्षेत्रमा अप्टिकल फाइबर बिछ्याएपछि मध्यपहाडी लोकमार्ग आसपासको सर्वसाधारणको पहुँचमा ब्रोड ब्याण्ड भनिने उच्च गतिको इन्टरनेट सेवा पुग्ने अधिकारीहरूले जनाएका छन् ।
टेलिकमले मध्यपहाडी लोकमार्ग र आसपासका सदरमुकाममा ३ हजार किलोमिटर बढी अप्टिकल फाइबर यस वर्षभित्र विस्तार गर्ने योजना सार्वजनिक गरेको छ । विज्ञहरूले भने विगतमा जस्तै ठेक्का प्रक्रियाले निम्त्याउन सक्ने समस्या चुनौतीपूर्ण हुन सक्ने आशंका प्रकट गरेका छन् ।
पूर्वी पाँचथरको चियो भञ्ज्याङदेखि गोर्खा धादिङको आरुघाटसम्मको झण्डै २२ सय किलो मिटर र उत्तर दक्षिणतर्फ सदरमुकाम समेत गरी ३ हजार किलोमिटर अप्टिकल फाइबर बिछ्याउने प्रक्रिया थालिएको हो ।
बोलपत्र
त्यसका लागि पाँचवटा अन्तर्राष्ट्रिय बोलपत्र आह्वान गरिसकिएको नेपाल टेलिकमले जनाएको छ । नेपाल दूरसञ्चार प्राधिकरणसँग सम्झौता गरेको २ वर्षपछि काम थाल्न सक्रिय देखिएको टेलिकमका अधिकारीहरूका अनुसार त्यसका निम्ति झण्डै ५ अर्ब रूपैयाँ छुट्याइको छ ।
नेपाल टेलिकमकी प्रबन्ध निर्देशक कामिनी राजभण्डारी भन्छिन्, ‘मलाई ६ महिनाभित्र ठेक्कापट्टाको सबै काम सम्पन्न गर्ने लक्ष्य दिइएको छ । त्यसनिम्ति बजेट पनि छुट्याइएको छ । काम द्रुत गतिमा हुनेछ ।’
सरकारले नेपाल टेलिकमको कामप्रति असन्तुष्टि व्यक्त गर्दै प्रबन्ध निर्देशक राजभण्डारीलाई स्पष्टिकरण सोधेका बेला टेलिकमले आइतवार आफ्नो योजना सार्वजनिक गरेको हो । पूर्वाधार विकासका महत्वाकांक्षी योजनाहरू सार्वजनिक गरेको टेलिकमले उक्त अप्टिकल फाइबर प्रदेश नम्बर १, २ र ३ का मुख्य शहरहरूमा गुणस्तरीय इन्टरनेट सेवा विस्तार हुने बताइएको छ ।
जटिलता
तर कतिपय सञ्चार प्रविधि विज्ञहरू ठेक्कापट्टाका कारण आयोजना प्रभावित हुनसक्ने आशंका गर्छन् । नेपाल दूरसञ्चार प्राधिकरणका पूर्व अध्यक्ष भेषराज कंडेल भन्छन्, ‘यहाँ चलखेल बढी हुन्छ । टेण्डर हालेकाहरू पनि कहाँ–कहाँ उजुरी हाल्न जान्छन् थाहै हुन्न । उनीहरूकै सम्बन्ध बलियो हुने रहेछ ।’
उनले थपे, ‘भौगोलिक र शारीरिक भन्दा जटिल प्रक्रिया सरकारी प्रणाली नै हो ।’ ठेकेदार प्रक्रियामा बाधा उत्पन्न भएकै कारण अन्य प्रदेशमा पनि अप्टिकल फाइबर राख्न बाधा उत्पन्न भएको उनको अनुभव छ । त्यो जोखिम आउन नदिन सरकारी र टेलिकम नेतृत्व चनाखो हुनपर्ने जानकारहरूको मत पाइन्छ । बीबीसी
