गण्डकीमा संक्रमितको संख्या २४ पुग्यो
स्याङजामा थप दुई र तनहुँमा एक जनालाई कोरोना
पोखरा, १८ जेठ । गण्डकी प्रदेशमा कोरोना भाइरसबाट संक्रमित हुनेको संख्या २४ पुगेको छ । आज (आइतबार) स्याङजामा थप दुई र तनहुँमा एक जनामा कोरोना पुष्टि भएको छ । प्रदेश जनस्वास्थ्य प्रयोगशालामा आइतबार गरिएको पीसीआर परीक्षणमा उनीमा कोरोना पुष्टि भएको हो ।
तनहुँमा भने पहिलो पटक कोरोना संक्रमण देखिएको हो । प्रदेशका बागलुङ, म्याग्दी, स्याङ्जा, पूर्वी नवलपरासी र लमजुङमा यसअघि कोरोना संक्रमित भेटिएका थिए ।
प्रदेश स्वास्थ्य निर्देशनालयका अनुसार स्याङ्जाको गल्याङ नगरपालिका ठेगाना भई सोही ठाउँमा क्वारेन्टाइनमा रहेका २७ र ४० वर्षका दुई पुरुषमा कोरोना संक्रमणको पुष्टि भएको हो ।
यसैगरी तनहुँको रिसिङ गाउँपालिकाको क्वारेन्टाइनमा बस्दै आएका २८ वर्षका पुरुषमा पनि कोरोना संक्रमण देखिएको स्वास्थ्य निर्देशक एवं गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा.विनोदबिन्दु शर्माले बताए ।
यस्तै बागलुङका १९ र ६५ वर्षका दुई महिला र लमजुङका ३ वर्षीय बालक भने उपचारपछि निको भएर घर फर्किएका छन । बागलुङमा ८, स्याङजामा ७, पूर्वी नवलपरासीमा ६ र म्याग्दी, तनहुँ र लमजुङका एक–एक जनामा कोरोना संक्रमण भेटिएको हो ।
पूर्वी नवलपरासीका ६ जनाको चितवनमा उपचार भइरहेको छ । संक्रमितमा लमजुङका एक बालकबाहेक सबै भारतलगायत विदेशबाट आएकाहरु हुन् ।