गुण एयरलाइन्सले आजदेखि काठमाडौं-सुर्खेत उडान गर्ने
काठमाडौं । निजी वायुसेवा कम्पनी गुण एयरलाइन्सले आज (आइतबार) देखि काठमाडौं-सुर्खेत व्यावसायिक उडान शुरु गर्ने भएको छ ।
सन् २०२२ को शुरुवातमै कम्पनीले थप गन्तव्यका रूपमा सुर्खेत उडान गर्न लागेको हो ।
हाल बुद्ध एयरलाइन्सले मात्र काठमाडौं-सुर्खेत रुटमा उडान गर्दै आएको छ । गुण एयरलाइन्सका प्रवक्ता एवं बजार प्रमुख प्रज्ज्वल थापाले आइतबार (पुस १८ गते) देखि १८ सिटे जहाजबाट उडान शुरुवात गर्न लागेको जानकारी दिए ।
काठमाडौं-सुर्खेत उडानका लागि भाडादर तोकिसकेको छ । अनलाइन टिकटमा काठमाडौं-सुर्खेतका लागि आठ हजार ५४५, नौ हजार ५४५ र ११ हजार ४२० भाडादर तोकिएको हो । गुण एयरलाइन्सले दैनिक बिहान ८ः३० बजे काठमाडौंबाट र सुर्खेतबाट ९ः५० बजे उडान भर्ने जनाएको छ ।
प्रवक्ता थापाले यही पुस २६ गतेदेखि भने दिउँसो २ः३० बजे काठमाडौंबाट र सुर्खेतबाट ३ः५० बजे उडान गर्ने जानकारी दिए । बुद्ध एयरले भने दैनिक बिहान ७ः२० बजे काठमाडौंबाट उडान भर्दै आएको छ ।
