आहा रारा गोल्डकप : आजदेखि क्वार्टर फाइनलका खेल
गण्डकी । पोखरामा जारी २३ औं संस्करणको आहा रारा पोखरा गोल्डकपअन्तर्गत आज (शनिबार) देखि क्वार्टर फाइनलमा खेल सुरु हुँदैछ । प्रतियोगिताको पहिलो क्वार्टर फाइनल खेल आज अपराह्न २ः३० बजे थ्रीस्टार क्लब र भूटानको पारो एफसीबीच हुने आयोजक सहारा क्लब पोखराले जनाएको छ ।
पोखरा रङ्गशालामा भइरहेको प्रतियोगितामा भूटानको पारो एफसीसहित साविक विजेता सङ्कटा क्लब, नेपाल प्रहरी फुटबल क्लब, त्रिभुवन आर्मी, सशस्त्र प्रहरी बल, मनाङ मस्र्याङ्दी, जावलाखेल युथक्लब, चर्च ब्वाइज, मच्छिन्द्र, थ्रीस्टार, राइजिङ स्टार र आयोजक सहारा क्लबले सहभागिता जनाएको क्लबका अध्यक्ष केशवराज बरालले जानकारी दिए ।
प्रतियोगिताका विजेताले रु १२ लाख एक हजार र उपविजेताले रु छ लाख एक हजार प्राप्त गर्ने उनले बताए । प्रि–क्वार्टर फाइनल विजेता र पराजित दुवै टोलीलाई जनही रु २०-२० हजार, क्वार्टर फाइनल विजेता र पराजित दुवै टोलीलाई रु ३०÷३० हजार र सेमिफाइनल विजेता तथा पराजित दुवै टोलीलाई रु ५०-५० हजार प्रदान गरिने जनाइएको छ । प्रतियोगिता यही माघ २० गतेसम्म सञ्चालन हुनेछ ।
