लालमटिया जङ्गलमा महिला र पुरुषको शव भेटियो
कपिलवस्तु । कपिलवस्तुको बाणगंगा नगरपालिका–२ लालमटिया सामुदायिक वनमा महिला र पुरुषको शव भेटिएको छ ।कप्टैया भन्ने स्थानको जङ्गलमा शनिवार साँझ महिला र पुरुषको शव फेला परेको इलाका प्रहरी कार्यालय पिपराका प्रमुख गोपाल रायमाझीले जानकारी दिए ।
मृतक पुरुष कप्टैयाकै स्थानीय ५० वर्षीय विष्णुप्रसाद घिमिरे र मृतक महिला कञ्चन गाउँपालिका– ५ निवासी ४५ वर्षीया यमकला राना रहेको रायमाझीले बताए । उनीहरूको शव नजिकै सल्फास नामक विषादीको पोका समेत फेला परेको थियो ।
उनीहरूले उक्त विषादी सेवन गरेको हुन सक्ने प्रहरीको अनुमान छ । शवलाई पोस्टमार्टमका लागि लुम्बिनी प्रादेशिक अस्पताल बुटवल पठाइएको छ । घटनाबारे थप अनुसन्धान भइरहेको प्रहरीले जनाएको छ ।
