शहीद लखन थापाको शालिक निर्माण


१६ बैशाख २०८१, आईतवार
Lakhan thapa

चितवन । नेपालका प्रथम शहीद लखन थापाको भरतपुर महानगरपालिका–१ रामनगरमा शालिक स्थापना गरिएको छ । भरतपुर महानगरपालिकाका प्रमुख रेनु दाहालले सालिकको अनावरण गर्दै शहीदको बलिदानबाट देशमा परिवर्तन सम्भव भएको बताइन् ।

उनले शहीदको बलिदानबाट प्राप्त उपलब्धिको रक्षाका निम्ति सबै जुट्नु पर्नेमा जोड दिइन् । उनले लखन थापा पार्क निर्माणमा महानगरपालिकाले सहयोग गर्ने प्रतिबद्धता पनि व्यक्त गरिन् । लखन थापा पार्क व्यवस्थापन समितिमार्फत साढे तीन फिट अग्लो शालिक निर्माण गरिएको हो । शालिक निर्माणका लागि महानगरले ११ लाख ४९ हजार प्रदान गरेको थियो ।

शालिक निर्माणमा १३ लाख खर्च भएको र बाँकी रकम स्थानीयले सहयोग व्यहोरेका समितिका अध्यक्ष निलकुमार मगरले जानकारी दिए । उनले शालिक स्थापनासँगै रामनगरमा बृहत् पार्क निर्माणको योजना रहेको बताए । बरण्डाभार जङ्गल क्षेत्रको २१ बिघा जग्गालाई वनभोजस्थल बनाउन लागेको उनले बताए । विसं १८९१ मा गोरखाको काहुले भङ्गारमा जन्मिएका लखन थापा १९३३ को फागुन २ मा शहीद भएका हुन् । सरकारले उनलाई २०७३ असोज ३ गते पहिलो शहीद घोषणा गरेको हो ।

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७