डा. केसी आफ्नै खर्चमा काठमाडौं फर्किए
धनगढी । स्वास्थ्य क्षेत्र सुधारको माग विगत राख्दै १० दिनदेखि अनसनरत डा. गोविन्द केसी आफ्नै खर्चमा काठमाडौं फर्किएका छन् ।
सरकारी खर्चमा काठमाडौं नजाने घोषणा गरेका केसी बुधबार आफ्नै खर्चमा प्लेन टिकट काटेर काठमाडौं गएका उनका सहयोगी डा. अमृत जैसीले बताए । उनी अहिले पौने ५ बजेको जहाजमार्फत काठमाडौं गएका हुन् ।
स्वास्थ्यमा गम्भीर समस्या देखिएपछि उपचारमा संलग्न डा. केसीलाई काठमाडौं जान सुझाव दिएका थिए । स्वास्थ्यकर्मीको सुझाव अनुसार केसी आफ्नै खर्चमा काठमाडौं गएका सेती प्रादेशिक अस्पतालका सिनियर फिजिसियन कन्सल्टेन्ट डाक्टर शेरबहादुर कमरले बताए ।
मंगलबारसम्म माग पुरा नभएसम्म काठमाडौं नजाने अडानमा बसेका केसीलाई बुधबार सिनियर स्वास्थ्यकर्मीले सम्झाएपछि उनी काठमाडौं जान सहमत भएका हुन् । काठमाडौंमा केसीलाई टिचिङ हस्पिटलमा राखेर उपचार दिइने जनाइएको छ ।
स्वास्थ्य समस्या देखिएको भन्दै मंगलबार सरकारी पहलमा डा. केसीलाई काठमाडौं लैजाने प्रयास गरेको थियो । तर केसीले सरकारी खर्चमा नजाने अडान राखेपछि उनलाई ओसार्न धनगढी पुगेको नेपाली सेनाको एयर ट्रक काठमाडौं फर्केको थियो ।
