प्रधानमन्त्री १२ औँ दिनमा अस्पतालबाट फर्किए बालुवाटार
काठमाडौँ, ३० फागुन : दोस्रा पल्ट सफल मिर्गौला प्रत्यारोपणपछि प्रधानमन्त्री केपी शर्मा ओली शुक्रवार साझा त्रिभुवन विश्वविद्यालय शिक्षण अस्पताल महाराजगन्जबाट डिस्चार्ज भएका छन् ।
डिस्चार्ज हुँदा उनले कुनै प्रतिक्रिया भने दिएनन् ।
अस्पतालबाट प्रधानमन्त्रीलाई ह्विलचेयरमा बाहिर निकालिएको थियो । बाहिर आएपछि भने प्रधानमन्त्री ओलीले अस्पतालमा पुगेका समर्थकलाई उभिएर हात हल्लाउँदै गाडीमा चढे । प्रधानमन्त्री ओली दोस्रो पटक मिर्गौला प्रत्यारोपणको लागि १९ फागुनमा अस्पताल भर्ना भएका थिए । प्रधानमन्त्री ओलीको २१ गते प्राध्यापक डाक्टर प्रेमराज ज्ञवाली नेतृत्वको टोलीले मिर्गौला प्रत्यारोपण गरिएको थियो ।
प्रधानमन्त्री डिस्चार्जको समयमा उपप्रधानमन्त्री ईश्वर पोखरेल, परराष्ट्र मन्त्री प्रदीप ज्ञवाली, स्वास्थ्य तथा जनसंख्यामन्त्री भानुभक्त ढकाललगायत नेकपाका नेता तथा कार्यकर्ताहरू अस्पताल पुगेका थिए ।
प्रधानमन्त्री ओलीलाई भान्जी नाता पर्ने झापाकी समीक्षा संग्रैलाले मिर्गौला दिएकी हुन् । समीक्षा भने बुधवार नै डिस्चार्ज भइसकेकी छन् । उनी प्रधानमन्त्री ओलीसँगै अघिल्लो साताको सोमवार अस्पताल भर्ना भएकी थिइन् ।