जुम्लामा बाढी–पहिरोको प्रारम्भिक क्षति : १८ हेक्टर धानको फाँट र १५२ भेडा–बाख्रा बगायो
जुम्ला, ३ कातिक । गएको तीन दिनदेखि लगातारको वर्षा र बाढीले देशभरको जनजीवन प्रभावित बनेको छ । यसैबीच वर्षा र बाढीले जुम्लामा पुर्याएको प्रारम्भिक क्षति मूल्याङ्कन गरिएको छ ।
प्रमुख जिल्ला अधिकारी विजयकुमारी प्रसाइँले प्रस्तुत गरेको जिल्लाको क्षति विवरणमा हिमा गाउँपालिका–६ का रत्ना शाही बाढी पहिरोमा परेर बेपत्ता भएकी छिन् ।
यस्तै तिला र भेरी नदीको बहाव बढ्न गइ नदी छेउछाउका १८ हेक्टर कालीमार्सी धानको क्षति भएको छ । सिञ्जा क्षेत्रको धानको क्षति भने आउन बाँकी छ ।
प्रजिअ पसाईका अनुसार तातोपानी र तिला गाउँपालिकामा १५२ भेडाबाख्रा र तातोपानीमा तीन भेडा संरक्षणका लागि राखिएका कुकुरलाई बाढीले बगाएको छ ।
तातोपानी गाउँपालिकाका अध्यक्ष नवराज न्यौपानेले तातोपानी गाउँपालिकामा धेरै क्षति भएको बताउनुभएको छ । तिला गाउँपालिकामा पनि धेरै नै क्षति भएकाले अध्यक्ष रतननाथ योगी र उपाध्यक्ष विष्णुमाया बुढा क्षतिग्रस्त क्षेत्रतिर छन् ।
जिल्ला कृषि विकास कार्यालयका प्रमुख बालाकराम देवकोटाले मार्सी धानको बीउ जोगाउनै कठिन हुने भएको जानकारी दिए । उनले बालीमा मात्रै अनुमानित ६ करोड रुपैयाँ बराबरको क्षति हुने जानकारी दिए ।