मन्त्री बनेको दुई दिनमै गोकर्णको गज्जब निर्णय : हजारौं युवा ठगीबाट बच्दै
काठमाडौं, ४ चैत : केपी शर्मा ओली सरकारमा श्रम तथा रोजगारमन्त्री बनेका गोकर्ण विष्टे आफू मन्त्री बनेको दुई दिनमै गज्जबको निर्णय गरेका छन् । उनको यो निर्णयसँगै रोजगारीका लागि विदेशिने हजारौं युवा दलालको ठगीबाट बच्ने भएका छन् । आफू मन्त्री बने लगतै श्रम तथा रोजगारमन्त्री गोकर्ण विष्टले वैदेशिक रोजगार ऐन संशोधन गर्ने बताएका छन् ।
२०६४ सालमा बनेको उक्त ऐन संशोधन नहुँदा विदेश जाने कामदार पीडित हुँदै आएका छन् । त्यतिबेलाको ऐन कामदारलाई भन्दा म्यानपावरलाई संरक्षण गर्ने भएको आरोप लाग्दै आएको छ । म्यानपावरले ठगी गर्दा समेत सोही ऐनको आडमा वैदेशिक रोजगार विभागले उन्मुक्ति दिँदा कामदार वर्षौंदेखि पीडित रहँदै आएका छन् ।
ऐन संशोधनमा विगतका श्रममन्त्रीको उदासीनताले पटक–पटक यो प्रयास असफल हुँदै आएको छ । मन्त्री भएको दोस्रो दिन मन्त्रालय पुगेका विष्टले भने, ‘मेरो पहिलो प्रयास वैदेशिक रोजगार ऐन संशोधन गर्ने हुनेछ । जुन ऐन उर्जा ऐन बनेपछिको सफलता जस्तै हुनेछ ।’
यस्तै उनले केन्द्रीकृत रहेका वैदेशिक रोजगारीका निकायलाई विकेन्द्रीत गर्ने बताए । देश संघीयतामा गए पनि वैदेशिक रोजगार विभाग केन्द्रीकृत रहेको छ। यसबारे संविधान समेत केही बोलेको छैन ।
‘ऐन संशोधन गरेर विकेन्द्रीकरण गर्ने र केही दिनमै २ नम्बर क्षेत्र र पश्चिमको कुनै पायक पर्ने ठाउँबाट श्रम स्विकृत दिन व्यवस्था मिलाइने छ’, विष्टले भने, ‘आइतबार नै मैले कम्तिमा दुई स्थानमा श्रम स्विकृत दिने व्यवस्था मिलाउन विभागका महानिर्देशक र सचिवलाई निर्देशन दिइसकेको छु ।‘ त्यस्तै उनले मन्त्रालयले लिने गरेको पीडितको उजुरीलाई पनि ६ दिन नै संकलन गरिने बताए । यसअघि मन्त्रालयले वैदेशिक रोजगारीको क्रममा पीडित हुनेको उजुरी हप्तामा एक दिन बुधबार मात्र लिने गथ्र्यो ।