बर्खामा कपन क्षेत्रमा जहिल्यै कष्ट (फोटो फिचर)
काठमाडौं । हरेक वर्ष बर्खा महिना शुरु भएसँगै काठमाडौं बुढानिलकण्ठ नगरपालिका–१० कपन क्षेत्रका नागरिकले डुबानको कष्ट झेल्नु पर्छ ।
यस क्षेत्रका बासिन्दाले हरेक बर्ष डुबानको समस्या झेल्दै आइरहेको भए पनि समस्या समाधानका लागि सरकारको तर्फबाट कुनै ठोस काम हुन सकेको छैन । पानी पर्नासाथ मिलन चोकदेखि भृकुटी चोकसम्मको सडकमा पानीको आहाल जम्छ । जसका कारण पैदल मात्र नभई गाडीमा हिंड्नेहरुलाई समेत समस्या पर्ने गरेको छ । सार्वजनिक यातायात, मोटरसाईकल, स्थानीय विद्यार्थीहरुले दैनिक आवातजावत गर्ने मिलचोक क्षेत्रको सडकमा घाम लाग्दा धुलो र पानी पर्दा डुबानको समस्या भोग्नु परिरहेको छ । थोरै बर्षा हुँदा पनि सडकमा आहाल जम्ने र घरभित्र समेत पानी पस्ने समस्याले आफूहरुलाई आजित बनाएको स्थानीयको गुनासो छ ।
कपन क्षेत्रदेखि गोपीकृष्ण, मिलनचोक, भृकुटीचोक, तेन्जिङचोकलगायतको क्षेत्र हरेक वर्ष बर्खा याममा डुबानमा पर्ने गरेको छ । कहिले सडक, कहिले ढल, कहिले खानेपानीको नाममा बनाइने संरचनाका कारण बर्खाको पानीले निकास नपाउँदा ढल मिसिएको बाढीको समस्या स्थानीयले व्यहोर्दै आएका छन् । अव्यवस्थित ढल अनि ढलमा पानीको मात्रा बढी भएर बिर्को समेत भत्किएर बाहिर बग्ने हुँदा यो क्षेत्र दुर्गन्धित हुने गरेको छ ।
मिलनचोक, गोपीकृष्ण हल सरस्वतीनगरलगायत आसपास क्षेत्र बर्षेनी डुबानमा पर्ने गरेको छ । बर्खामा आकाशको पानी र अन्यत्रबाट बगेर आउने बाढीले यस क्षेत्रका अधिकांश सडक पोखरी बन्ने गरेको स्थानीय बताउँछन् ।
ढल व्यवस्थापनको त्रुटी, बर्खाको पानी बगेर जाने निकास नहुनु आदि कारणले यस क्षेत्रको सडक पोखरी जस्तो हुने गरेको छ । स्थानीय कृष्ण लुईटेलका अनुसार २०६० सालसम्म आनी गुम्बादेखि झरेको चुकुन्चा खोला मिलन चोक हुँदै सात तलेसम्म बाहिरबाटै बग्ने गरेको बताए । लुईटेलका अनुसार अहिले खोलामाथि सडक बनाईका कारण स्थानीयले हरेक बर्ष सास्ती भोग्नु परेको छ । हरेक बर्ष जताततै बग्ने ढलको पानीका कारण सडकको कालोपत्रे समेत भत्काइसकेको छ । कपन प्रवेश गर्ने गोपीकृष्णसँगैको सडकको मुखैमा ठूला–ठूला खाल्डा बनेका छन् ।
गत असोजमा बूढानीलकण्ठ नगरपालिका–१० को सीमानामा रहेको तरकारी बजार नजिकैको ढलमा खसेर १० वर्षीय बालक उज्ज्वल विकको मृत्यु समेत भएको थियो । बालकको शव पाँच दिनपछि ललितपुरको वाग्मती गाउँपालिका–१ घुसेलको बाग्मती नदी किनारमा फेला परेको थियो ।
मिलन चोकमा धेरै पटक मोटरसाइकल, टेम्पो बर्खाको भलले बगाइसकेको बताउँदै कपनका व्यवसायी दीपक नेपाली भन्छन्, ‘खै यो दुःख कहिलेसम्म भोग्नु पर्ने हो । काठमाडौंमै यस्तो कष्ट हुँदा पनि सरकार र सरकारमा बसेका नेताहरुको आँखा पुग्न सकेन ।’
मिलनचोकमा पानी पर्ने बित्तिकै सडकमा खोलो नै बग्ने गरेको स्थानीय बताउँछन् । स्थानीयवासी सडक समेत पार गर्न सक्दैनन् । हरेक वर्ष यस क्षेत्रमा बाढी आउने गरेको भए पनि नजिकैको स्थानीय सरकारले सो विषयमा थाहा पाएर पनि नपाएझैं गर्ने गरेको स्थानीयको आरोप छ ।
खाल्डा परेका सडकमा पानी जमिएर छोपिंदा मोटरसाइकल, साइकल चलाउनेहरु दुर्घटनामा समेत पर्दै आएका छन् । स्थानीयले धेरै पटक सम्बन्धित निकाय र जनप्रतिनिधिसँग सडक मर्मत तथा स्तरोन्नतिका लागि माग नगरेका पनि होइनन् तर हुन्छ भन्ने, काम नगर्ने प्रवृत्तिले हैरान भएको उनीहरूको गुनासो छ ।
कपनको सडक हुँदै गुड्ने मोटरसाइकल, साइकल, स्कुटरमा यात्रा गर्नेलाई त निकै समस्या छ । कता खाल्डो छ भन्ने थाहा नपाउँदा दुर्घटना समेत हुने गरेको छ ।
कपनको मिलनचोक, साततले, कपन प्रहरी प्रभाग, आकाशे धारा हुँदै बालुवाखानी पुग्ने सडकको अवस्था पनि नाजुक छ । लामो समयदेखि खनेको ढलको खाल्डो र यसैबाट बनेको हिलो र चिप्लोबाटो माथि बग्ने पानीको भलले यहाँका बासिन्दा पीडित छन् ।कपन चौकी हुँदै मिलनचोक तरकारी बजारबाट साततले पानीको भेलले चार ठाउँमा सडक अवरूद्ध हुने गरेको छ । हरेक वर्ष बर्खा आउँछ, सडक बगाउँदा पनि सरकारी बेवास्ताका कारण यहाँका व्यवसायी र स्थानीय चिन्तित बनेका छन् ।
बुढानिलकण्ठ नगरपालिका–१० का वडाध्यक्ष नवराज भट्टराईको यस क्षेत्रको सडक सुधारका लागि ४५ करोड योजना परेको बताउँछन् । उनले आनी गुम्बादेखि मिलन चोकको तरकारी बजारसम्म सडक बन्ने कुरा सुनिश्चित भइसकेको बताउँछन् । उनले केपी शर्मा ओली प्रधानमन्त्री भएका बेला एमाले नेता राजन भटराईको पहलमा सडक निमाणको काम शुरु भएको नयाँपेजलाई जानकारी दिए । तर ठेकेदारले ढिलासुत्ती गरेका कारण काम छिटो हुन नसकेको उनले बताए ।
दिनहुँ सडकको हैरानी खेप्नुपरेका स्थानीय ढलको उचित व्यवस्थापन गर्नुपर्ने बताउँछन् । स्थानीय जनप्रतिनिधिको बेवास्ताकै कारण यस क्षेत्रको सडक बेहालको अवस्थामा रहेको कपनवासीको गुनासो छ ।
