शेयर बजार आज पनि दोहोरो अंकले बृद्धि, एक अर्ब ४४ करोडको कारोबार
काठमाडौँ । शेयर बजार आज (मंगलबार) पनि उकालो लागेको छ । हिजो (सोमबार) झण्डै १८ अंकले बढेको शेयर बजार परिसूचक नेप्से आज १२ दशमलव ४१ अंकले बढेर एक हजार नौ सय १८ दशमलव ४१ विन्दुमा पुगेको छ ।
आज विकास बैंक, फाइनान्स र निर्जीवन बीमा समूहको शेयर सामान्य घटेको छ भने अरू समूहको शेयर बढेको छ । पछिल्ला तीन दिन उच्च अंकले घटेको माइक्रोफाइनान्स समूहको शेयर आज उच्च अंकले बढेको छ ।
आज बजारसँगै कारोबार रकम पनि बढेको छ । २५८ वटा कम्पनीका ४० लाख ७७ हजार कित्ता शेयर एक अर्ब ४४ करोड ३७ लाख रुपैयाँमा कारोबार भएका छन् । सबैभन्दा धेरै आईएमई जनरल इन्सुरेन्सको छ करोड १५ लाख रुपैयाँको शेयर किनबेच भयो ।
आज सबैभन्दा धेरै सुपरमाई हाइड्रो, एसियन हाइड्रो र सृजनशील लघुवित्तको शेयर १० प्रतिशतले बढेको छ । समग्रमा बजार बढेको दिन आज सबैभन्दा धेरै तेह्रथुम पावर कम्पनीको शेयर तीन प्रतिशतभन्दा धेरैले घटेको छ ।
