सुरु भयो मनसुन : देशभर फैलिन अझै केहि दिन लाग्ने
आज बाग्मती, गण्डकी र कोशी प्रदेशमा वर्षा, एक–दुई ठाउँमा ठूलो पानी पर्ने
काठमाडौं । देशको पूर्वी तथा मध्य भू–भागमा आज (बिहीबार) मनसुनी प्रणालीको प्रभाव रहेको मौसमविदले जनाएका छन् । बाँकी भू–भागमा पश्चिमी वायुको आंशिक प्रभाव रहेको जल तथा मौसम विज्ञान विभागले जनाएको छ । आज पनि देशका मध्य तथा पश्चिम तराईका भू–भागहरूमा अत्याधिक गर्मी हुने सम्भावना रहेको छ । अत्याधिक गर्मीबाट हुन सक्ने जोखिम वा क्षतिबाट बच्न आवश्यक सतर्कता अपनाउन विभागको आग्रह छ ।
मनसुन सुरु भएका भू–भागमा भने गर्मी केही कम भइसकेको छ । कोसीदेखि गण्डकी प्रदेशसम्म तापक्रम कम भएको मौसमविद् विनु बताउँछिन् । ‘मनसुन प्रणालीमा बाक्लो बादल लाग्ने र पानी पर्ने भएकाले तापक्रम पनि घट्ने भएकाले कम गर्मी हुन्छ’, उनले भनिन्, ‘त्यसैले मनसुन सुरु हुनुभन्दा अगाडि धेरै गर्मी हुन्छ भने मनसुन सुरु भएपछि गर्मीको महसुस कम हुन्छ ।’
यसैबीच, कोसी प्रदेशलगायत देशका पहाडी भू–भागमा आज बिहान आंशिकदेखि सामान्य बदली रहेको छ । बाँकी भू–भागमा आंशिक बदलीदेखी मौसम सामान्यतया सफा रहेको छ । कोसी प्रदेश, वाग्मती प्रदेश र गण्डकी प्रदेशका थोरै स्थानमा मेघगर्जन र चट्याङसहित हल्का वर्षा भइरहेको छ ।
आज दिउँसो कोसी प्रदेशलगायत देशका पहाडी भू–भागमा आंशिकदेखि सामान्य बदली रहेको छ । बाँकी भू–भागमा आंशिक बदलीदेखि मौसम सामान्यतया सफा रहनेछ । कोसी, वाग्मती र गण्डकी प्रदेशका केही स्थानमा र बाँकी पहाडी भू–भागका थोरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको विभागले जनाएको छ ।
आज राति कोसी प्रदेशलगायत देशका पहाडी भू–भागमा आंशिकदेखि सामान्य बदली रहनेछ । बाँकी भू–भागमा आंशिक बदलीदेखि मौसम सामान्यतया सफा रहनेछ । विभागका अनुसार कोसी प्रदेशलगायत वाग्मती र गण्डकी प्रदेशको पहाडी भू–भागका केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ । मधेस प्रदेशसहित देशका बाँकी पहाडी भू–भागका थोरै स्थानमा मेघगर्जन र चट्याङसहित क्षणिक वा हल्का वर्षाको सम्भावना रहेको छ ।
मनसुन प्रणाली अहिलेसम्म गण्डकी प्रदेशको पोखरासम्म पुगेको छ । त्यसबाट पश्चिमी भू–भागमा मनसुन फैलिन बाँकी छ । नेपालमा हिजो (बुधबार)बाट मनसुन नेपाल प्रवेश गरेको हो । मौसमविद् विनु महर्जनका अनुसार अझै सुदूरपश्चिम प्रदेशसम्म मनसुन फैलिन केही दिन लाग्नेछ । ‘नेपालमा मनसुन प्रवेश गरेपछि नेपालभर फैलिन औसतमा पाँचदेखि सात दिन लाग्छ । तर, यो औसत समय मात्रै हो’, महर्जनले भनिन्, ‘यो समयभन्दा केही तल वा माथि पनि हुनसक्छ देशभर मनसुनको कभरेज हुन ।’
यो वर्ष मनसुन देशभर फैलिन केही दिन ढिलो हुनसक्ने उनले जानकारी दिएकी छन् । अरेवियन सागरमा रहेको चक्रवातका कारण पश्चिमी वायु स्ट्रङ भएकाले मनसुन देशभर फैलिन केही समय ढिलो हुनसक्ने उनी बताउँछिन् ।
गए राति देशका धेरै ठाउँमा मनसुनी वर्षा भएको छ । गण्डकी, कोशी र बाग्मती प्रदेशका केही ठाउँमा ठूलो वर्षा भएको छ । ठूलो वर्षाका कारण यी प्रदेशका केही नदी तथा खोलामा पानीको बहाव बढेको छ । मौसम पूर्वानुमान महाशाखाका अनुसार पछिल्लो २४ घण्टामा लमजुङको खुदी बजारमा १३० मिलिमिटर पानी परेको छ । यस्तै, लमजुङकै कुन्सामा १०३ मिलिमिटर, कास्कीको सिक्लेसमा ९३ दशमलव २, लमजुङको गैरीढुंगामा ८५, रैनास्तर ९० दशमलव ४ मिलिमिटर वर्षा भएको छ ।
यस्तै, बाग्मती प्रदेशको मकवानपुरको दामनमा ७० दशमलव २ मिलिमिटर वर्षा भएको छ । यस्तै, धादिङ धुनीबेशीमा ७१ दशमलव ४, काठमाण्डौको बूढानीलकण्ठ आसपासमा ३६ मिलिमिटर र ललितपुरको लेलेमा ६० दशमलव ४ मिलिमिटर वर्षा भएको छ । यसपालिको मनसुनमा देशभर १२ लाख ५४ हजार जनाभन्दा धेरै नागरिक प्रभावित हुने अनुमान गरिएकोे छ । विपद् न्यूनीकरण तथा व्यवस्थापन प्राधिकरणका अनुसार २ लाख ८६ हजारभन्दा धेरै घरधुरीमा असर पर्ने सम्भावना छ ।
