सुशासनको अभियान असफल गराउने दुष्प्रयत्न भइरहेको छ : उपप्रधानमन्त्री श्रेष्ठ
काठमाडौं । उपप्रधानमन्त्री एवं गृहमन्त्री नारायणकाजी श्रेष्ठले सरकारले थालेको सुशासनको अभियानलाई असफल गराउने दुष्प्रयत्न भइरहेको आरोप लगाएका छन् ।
आज (बिहीबार) नेपाल पर्वतारोहण संघको ३३ औँ वार्षिक साधारणसभालाई सम्बोधन गर्दै मन्त्री श्रेष्ठले सरकारको सुशासनको अभियानलाई असफल गराउने दुष्प्रयत्न भइरहेको बताएका हुन् । जुन प्रवृत्ति र तागतका विरुद्ध सुशासनको अभियान सुरु गरिएको हो सोही प्रवृत्ति र तागतहरू संगठित भएर सरकारको अभियान असफल गर्न लागेका उपप्रधानमन्त्री श्रेष्ठको भनाइ छ । तर, सरकारले सुशासनको अभियानबाट विश्राम नलिने उनले बताए ।
‘सुशासन जुन प्रवृत्तिका विरुद्ध, जुन तागतका विरुद्ध सञ्चालन गरिएको हो । ती प्रवृत्ति र तागतहरू संगठित भएर यसलाई असफल गराउने दुष्प्रयत्न गर्दैछन्,’ श्रेष्ठले भने, ’तर सरकारले यो सुशासनको अभियानलाई छोड्नेवाला छैन । सुशासनको अभियानबाट विश्राम लिनेवाला छैन ।’
सुशासनको अभियानलाई सफल बनाउँदै नेपाललाई समृद्ध नेपाल बनाइछाड्ने श्रेष्ठको भनाइ छ । देशलाई समृद्ध बनाउन राष्ट्रिय मुद्दाहरूमा सबै राजनीतिक पार्टीहरूले सहमति कायम गर्नुपर्ने उनले बताए ।
