पदभार ग्रहण गर्दै उपप्रधानमन्त्री यादवले भने–जनताको सेवा गर्नलाई वरियताले फरक पर्दैन
काठमाडौँ । नव नियुक्त उपप्रधान एवं स्वास्थ्य तथा जनसंख्यामन्त्री उपेन्द्र यादवले जनताको सेवा गर्न वरियताले फरक नपर्ने स्पष्ट पारेका छन् । आज (आइतबार) राष्ट्रपति रामचन्द्र पौडेलबाट उपप्रधान एवं स्वास्थ्य तथा जनसंख्यामन्त्रीको शपथ ग्रहणपछि मन्त्रालयमा पदभार ग्रहण गरेपछि सञ्चारकर्मीहरुसँग कुरा गर्दै उनले यस्तो बताएका हुन् ।
पटक–पटक उपप्रधानमन्त्रीको जिम्मेवारी सम्हाल्नु भएको तपाईले उपप्रधान एवं गृहमन्त्री रवि लामिछानेपछिको वरियतामा बस्न किन चाहनु भयो ? भन्ने सञ्चारकर्मीहरुको प्रश्नमा उनले जनताको सेवा गर्नेलाई वरियताको मतलव नहुने बताए । उनले ग्रासरुटमा बसेर काम गर्ने मान्छेलाई यस्ता कुराको वास्ता नहुने बताएका छन् । उनले स्वास्थ्योपचारका लागि लामो लाइनमा बस्नुपर्ने अवस्थाको अन्त्य गर्दै स्वास्थ्योपचारलाई सहज र डिजिटल प्रविधिमार्फत घरैबाट पनि चिकित्सकको समय लिनसक्ने बनाउने निर्णय गरे ।
