कति निर्दयी श्रीमान ! उम्लिरहेको तेलमा श्रीमतीको अनुहार डुबाई दिएर फरार
सिन्धुली, १८ कार्तिक । मान्छे पशु बन्यो भने कतिसम्म निर्दयी काम गर्न सक्छ भन्ने कुराको उदाहरण सिन्धुलीका एक युवा बनेका छन् ।
दुधौली नगरपालिका–४ एकहटिया निवासी ३५ वर्षीय रितु सदा (मुसहर) ले ३२ वर्षीया श्रीमती आशा सदाको अनुहार उम्लिरहेको तेलमा डुबाएर गम्भीर घाइते बनाएर फरार भएका छन् ।
सामान्य घरायसी विवादमा रितुले शनिबार राति श्रीमतीको अनुहार माछा तारिरहेको तेलमा डुबाई दिएको जिल्ला प्रहरी कार्यालय सिन्धुलीले जनाएको छ ।
घाइते महिलाको स्थानीय मेडिकलमा सामान्य उपचारपछि आइतबार नै थप उपचारका लागि जिल्ला अस्पताल सिन्धुली ल्याइएको र यहाँ पनि राम्रो उपचार नहुने भएपछि काठमाडौ पठाइएको जिल्ला प्रहरी कार्यालय सिन्धुलीले जानकारी दिएको छ ।
घटनापछि उनका श्रीमान रितु फरार रहेका छन् । उनको खोजी भइरहेको प्रहरीले जनाएको छ । महिलाको आर्थिक अवस्था निकै कमजोर रहेकाले काठमाडौसम्म जाने र टिचिङ हस्पिटलमा निःशुल्क उपचारको व्यवस्था मिलाएर पठाएको सिन्धुली अस्पताल विकास समितिका अध्यक्ष प्रल्हाद पोख्रेलले बताए ।
शनिबार बेलुका रितु र आशाबीच घरायसी विवाद हुँदा झगडा भएको थियो । झगडाले उग्ररुप लिँदा रितुले श्रीमतीमाथि कुटपिट गरी माछा तार्न उमालिरहेको तेलमा अनुहार डुबाई दिएको आशाकी आमा मंगली सदाले बताएकी छन् ।