कप्तान ज्ञानेन्द्र मल्लले ३७ बलमा बनाए शतक
पोखरा, २ पुष । पोखरा प्रिमियर लिग (पिपिएल) टी–२० क्रिकेट प्रतियोगितामा काठमाडौं गोल्डेन्स वारियर्सका कप्तान ज्ञानेन्द्र मल्लले शतक प्रहार गरेका छन् ।
राष्ट्रिय क्रिकेट टिमको समेत कप्तान रहेका उनले बुधबार पोखरा रंगशालामा धनगढी ब्लुजविरुद्धको खेलमा ३७ बलमै शतक प्रहार गरेका हुन् ।
उनले आफ्नो खेल जीवनको छिटो शतक प्रहार गरेका हुन् । उनले ३७ बलमा ८ चौका र ९ छक्का प्रहार गरेका थिए ।
उनले ३८ औं बलमा उनी धनगढीका कमलसिंह ऐरीको बलमा सन्दीप जोराबाट समातिएका थिए । ज्ञानेन्द्रले १३ औं ओभरको पाँचौ बलमा बिक्रम ठगुन्नालाई छक्का प्रहार गर्दै २४ बलमा अर्ध शतक पुरा गरेका थिए ।
टस हारेर ब्याटिङ थालेको काठमाडौं गोल्डेन्स वारियर्सले उनको विष्फोटिङ ब्याटिङमा निर्धारित १७ ओभरमा ५ विकेट गुमाउँदै १ सय ८५ रन बनायो ।
हुस्सुको कारण निर्धारित समय भन्दा केहि ढिला खेल सुरु हुँदा खेल १७ ओभरमा झारिएको थियो ।
काठमाडौंलाई विशाल योगफलसम्म पुर्याउन कप्तान ज्ञानेन्द्र मल्लको शतकसँगै जयकिशन कोल्सावाले ३७ बलमा ४ चौका र २ छक्का सहित ४६ रन बनाए ।
तेस्रो विकेटका लागि ज्ञानेन्द्र र जयकिशनले १ सय ३१ रनको शतकीय साझेदारी गरेपछि विशाल योगफलमा पुगेको हो ।
धनगढीका लागि कमल सिंह ऐरीले ४ ओभरमा ३७ रन खर्चेर ४ विकेट लिए । सागर ढकालको नाममा १ विकेट रह्यो ।
