बलात्कार आरोपित एसएसपी राणालाई पाँच दिन हिरासतमा राख्न अदालतको अनुमति
काठमाडौंं, २० माघ । बलात्कार आरोपमा आत्मसमर्पण गरेका नेपाल प्रहरीका वरिष्ठ उपरीक्षक (एसएसपी) सौरभ राणालाई पाँच दिन हिरासतमा राख्न आज (सोमबार) अदालतले अनुमति दिएको छ ।
जिल्ला अदालत सुनसरीले सोमबार उनलाई हिरासतमा राखेर अनुसन्धान गर्न अनुमति दिएको हो । जिल्ला प्रहरी कार्यालय, सुनसरीका प्रमुख यज्ञविनोद पोखरेलले जबरजस्ती करणीसम्बन्धी कसुरमा अनुसन्धानका लागि पाँच दिन समय प्राप्त भएको बताए ।
राणाले घटनामा सत्यता नभएको बताउँदै आएका छन् । पीडित महिलाले भने इटहरीको एक होटलमा आफूमाथि बलात्कार गरिएको भन्दै शुक्रबार प्रहरीमा किटानी जोहरी दिएकी थिइन् । उनको धरानस्थित बिपी कोइराला स्वास्थ्य विज्ञान प्रतिष्ठानमा स्वास्थ्य परीक्षण भइसकेको छ भने विस्तृत अनुसन्धान जारी छ ।
