संवैधानिक निकायमा गरिएका नियुक्ति बदर माग गर्दै सभामुखद्वारा रिट दर्ता, आइतबार सुनुवाइ (निवेनदसहित)
काठमाडौं, २३ माघ । संवैधानिक निकायमा गरिएका नियुक्तिहरु अवैध ढंगबाट गरिएको भन्दै
सभामुख अग्निप्रसाद सापकोटाले आज (शुक्रबार) सर्वोच्च अदालतमा रिट निवेदन दर्ता गराएका छन् ।
रिट निवेदनमाथि आइतबार पेशी तोकिएको छ । संवैधानिक परिषद्का सदस्य समेत रहेका सापकोटाले ती नियुक्तिका लागि परिषद्ले गरेको सिफारिश प्रक्रिया नै कसरी अवैध छ भनी बिभिन्न कारण पेस गर्दै नियुक्त बदर गर्न माग गरेका छन् ।
ती निकायमा सिफारिश गर्ने परिषद्को बैठकमा सभामुख सापकोटा अनुपस्थित रहेका थिए । उनले आफू कार्यव्यस्तताका कारण उपस्थित हुन नसकेको बताएका छन् । सभामुख सापकोटाले प्रधान न्यायाधीश, प्रधानमन्त्री, राष्ट्रियसभाका अध्यक्ष लगायतलाई विपक्षी बनाएर रिट दर्ता गराएका हुन्। उनको रिटमाथि आइतबार सुनुवाई हुने जनाइएको छ ।
सभामुख सापकोटाले पत्रकार सम्मेलन गर्दै रिट बारेमा थप धारणा राख्दै छन् । प्रतिनिधिसभा विघटनपछि संवैधानिक परिषदले सभामुख तथा प्रमुख प्रतिपक्षी दलका नेताको अनुपस्थितिमा नै विभिन्न संवैधानिक निकायमा नियुक्तिको सिफारिस गरेको थियो । सभामुख सापकोटाले नियुक्तिको पत्र फिर्ता गर्दा समेत सरकारले सिफारिस गरेकाहरुलाई शपथ ग्रहण गराएको थियो ।
