नयाँ बानेश्वरमा कांग्रेस संसदीय दलको बैठक शुरु
काठमाडौं । नयाँ बानेश्वरस्थित संसद भवनको ल्होत्से हलमा कांग्रेस संसदीय दलको बैठक शुरु भएको छ । प्रधानन्यायाधीश चोलेन्द्र शमशेर जबराविरुद्धको महाभियोग प्रस्तावमाथि छलफल गर्न कांग्रेसले दलको बैठक बोलाएको छ ।
त्यस्तै अमेरिकी सहायता परियोजना एमसीसीलाई संसदमा टेबुल गर्नेबारे पनि यो बैठकमा कुरा हुने जनाइएको छ । सत्तारुढ गठबन्दका दलहरु कांग्रेस, माओवादी केन्द्र र एकीकृत समाजवादीले आइतबार प्रधानन्यायाधीश जबराविरुद्ध संसद सचिवालयमा महाभियोग प्रस्ताव पेश गरेका थिए ।
त्यसैगरी सोमबार सभामुख अग्नि सापकोटाले बोलाएको सर्वदलीय बैठकमा पनि नेताहरु एमसीसी अघि बढाउने दिशामा सहमति नजिक पुगेका थिए । प्रतिनिधिसभाको बैठक बुधबार बस्दैछ । संसदमा पेश भएको प्रधानन्यायाधीशविरुद्धको महाअभियोग प्रस्तावका सम्बन्धमा प्रमुख प्रतिपक्षी दल एमालेले पनि सोमबार संसदीय दल बैठक गरेको थियो ।
एमालेले महाअभियोगको प्रतिवाद गर्ने बताए पनि ठोस निणर्य भने गरेको छैन । एमालेले त्यसको निणर्य गर्ने जिम्मा अध्यक्ष केपी ओलीलाई दिएको छ ।