प्रहरी जबराको सुरक्षाका लागि राखिएको हो, निवासबाट निस्कन नदिन होइन : एसएसपी कार्की
काठमाडौं। निमित्त प्रहरी प्रवक्ता प्रहरी वरिष्ठ उपरीक्षक (एसएसपी) दानबहादुर कार्कीले निलम्बित प्रधानन्यायाधीश चोलेन्द्रशमशेर जबरालाई निवासबाट निस्कन नदिइएको विषय अस्वीकार गरेका छन् ।
आज (आइतबार) सञ्चारकर्मीहरूलाई प्रतिक्रिया दिँदै एसएसपी कार्कीले सुरक्षाको विषयले मात्र प्रधानन्यायाधीशको निवासमा प्रहरी राखिएको स्पष्ट पारेका छन् ।
सुरक्षाका कुनै विषय नउठोस् भनेर अन्य दिनभन्दा केही बढी सुरक्षाकर्मी परिचालन गरिएको उनले बताएका छन् । ‘सुरक्षाको विषयले प्रधानन्यायाधीशको निवासमा प्रहरी राखिएको हो । निवासबाट सामान्य जस्तै अन्यत्र जान पाउनु हुन्छ,’ उनले भने, ‘अन्य दिनभन्दा बढी उपस्थित भएकाले रोकेको भन्ने बुझाइ हुन सक्छ । सुरक्षाको विषयमा केन्द्रित भएर प्रहरी राखिएको हो ।’
यसअघि निवासमै रोकिएको भन्ने विषयमा जबराले आक्रोशित हुँदै आफू सर्वोच्च जाने तयारीमा रहे पनि सरकारले निवासमै रोकेको बताएका छन् ।