दीपिका पादुकोण र कासिलासले विश्वकप ट्रफी बोक्ने
काठमाडौं । फिफा विश्वकप कतार २०२२ अन्तर्गत फाइनल खेलअघि भारतीय अभिनेत्री दीपिका पादुकोण र स्पेनिस गोलरक्षक इकर कासिलासले विश्वकप ट्रफी बोक्ने भएका छन् ।
फाइनल खेलमा दुई टोली मैदान प्रवेश गर्नुअघि परम्परागत रुपमा फिफा विश्वकपको ट्रफी मैदानमा ल्याउने प्रचलन रहेको छ । त्यसै कार्यक्रममा अभिनेत्री दीपिका पादुकोण र इकर कासिलासले कतार विश्वकपको फाइनलअघि ट्रफी मैदानसम्म ल्याउन लागेका हुन् ।
दीपिका फिफाको पार्टनर लुइस भूतोंको प्रतिनिधिका रुपमा ट्रफी बोक्न लागेकी हुन् । कासिलास सन् २०१० मा स्पेनले विश्वकप जित्दा टोलीका कप्तान थिए । यसअघि उद्घाटन समारोहमा फ्रान्सका मार्से डेजाइलीले ट्रफी मैदानमा ल्याएका थिए ।
विश्वकप सुरु हुनुभन्दा एक दिन अघि लुइ भुटोंले लिओनेल मेस्सी र क्रिस्टियानो रोनाल्डोको एकसाथ चेस खेलेको तस्विर सार्वजनिक गरेको थियो ।