कुवेतविरुद्ध नेपालको उत्कृष्ट शुरुवात
काठमाडौं । नेपालले एसीसी प्रिमियर कपको सेमिफाइनल खेलमा कुवेतविरुद्ध उत्कृष्ट शुरुवात गरेको छ । टस हारेर पहिला ब्याटिङको निम्तो पाएको नेपालले ५० रन कटाएको छ । ओपनरद्वय आशिफ शेख र कुशल भूर्तेलको जोडीले ताजा अवस्थामा सातौ ओभरको अन्त्यमा ५६ रन बनाएर खेलिरहेका छन् ।
भूर्तेलले ६ चौका र एक छक्कासहित ३७ रन बनाएका छन् भने शेखले १ चौका र दुई छक्कासहित गरी २१ रन प्रहार गरेका छन् । टस जितेर कुवेतका कप्तान मोहम्मद अस्लामले टस जितेर पहिला फिल्डिङ गर्ने निर्णय लिएपछि नेपाललाई ब्याटिङको निम्ता पाएको थियो । आज (शनिबार) को खेलमा नेपालका गुलशन झालाई बेञ्चमा राखेर करण केसीलाई मैदानमा उतारिएको छ ।
खेल त्रिवि क्रिकेट मैदानमा भइरहेको छ । घरेलु टोली नेपाल समूह ‘ए’ को विजेता र कुवेत समूह ‘बी’ को उपविजेताको रुपमा सेमिफाइनलमा भेट भएका हुन् । नेपाल अपराजित छ भने कुवेतले पहिलो खेल युएईसँग १४३ रन फराकिलो अन्तरले हारेको थियो ।
नेपाली टोली
रोहित पौडेल (कप्तान), कुशल भुर्तेल, आसिफ शेख, कुशल मल्ल, आरिफ शेख, सोमपाल कामी, दीपेन्द्रसिंह ऐरी, करण केसी, सन्दीप लामिछाने, भीम सार्की र ललित राजवंशी ।
