भारतले भूकम्पपीडितलाई पहिलो चरणमा पठायो ११ टन राहत सामग्री (तस्वीरहरु)
काठमाडौं । जाजरकोटलाई केन्द्रविन्दू बनाएकार शुक्रबार आएको विनाशकारी भूकम्पबाट प्रभावित नागरिकको राहत तथा प्राथमिक उपचारका सामग्रीसहित भारतीय वायुसेनाको विशेष विमान नेपालगञ्ज विमानस्थलमा अवतरण गरेको छ ।
विशेष विमानको पहिलो खेपमा टेन्ट, स्लिपिङ ब्याग, कम्बललगायतका अत्यावश्यक ११ टनभन्दा बढी सामग्री आइतबार आएको भारतीय राजदूत नवीन श्रीवास्तवले जानकारी गराएका छन् । उनले ती सामग्री उपप्रधान तथा रक्षामन्त्री पूर्णबहादुर खड्कालाई हस्तान्तरण गरेका छन् । सोमबार अर्को विमान पनि स्वास्थ्य सामग्री र अत्यावश्यक वस्तु लिएर आउने उनले जानकारी गराए ।
टेन्टलगायत सामानको आवश्यकता बढी भएकाले ती सामग्री थप ल्याउन पहल गरिने उनले बताए । नेपालको भूकम्पमा सहयोग प्रदान गर्ने भारत पहिलो मुलुक बनेको छ । भारतीय राजदूतले करिब १० करोडको सामग्री आइसकेको र आवश्यकताअनुसार अरु पनि सहयोग आउने बताए । सो अवसरमा उपप्रधानमन्त्री खड्काले भारतको सहयोगका लागि धन्यवाद दिए । विमानस्थलमा कर्णालीका मुख्यमन्त्री राजकुमार शर्मा पनि पुगेका थिए ।
