रविलाई विश्वप्रकाशको प्रश्न : गृहमन्त्री चाहिन्छ भन्ने मित्रले प्रधानमन्त्री प्रस्ताव किन खानु भएन ?
काठमाडौं । प्रमुख प्रतिपक्षी नेपाली कांग्रेसका सांसद विश्वप्रकाश शर्माले प्रधानमन्त्री पदको प्रस्ताव किस्तीमा राखेर गरिएको भन्ने भ्रमबाट मुक्त हुन सबैलाई आग्रह गरेका छन् ।
आज (बुधबार) को प्रतिनिधिसभा बैठकमा शर्माले रास्वपाका सांसद स्वर्णिम वाग्लेले कांग्रेसले आफ्नो पार्टीलाई प्रधानमन्त्री प्रस्ताव गरिएको प्रसङ्ग कोट्याउँदै यस्तो आग्रह गरेका हुन् । शर्माले भने, ‘नाइँ मलाई त्यही गृहमन्त्री चाहिन्छ भन्दै गरेको मित्रले प्रधानमन्त्री प्रस्ताव गरेपछि किन खानु भएन होला ? कांग्रेसको सभापति वा महामन्त्रीहरूले संस्थागत निर्णय नगरिकन कसैलाई प्रधानमन्त्री पदको प्रस्ताव किस्तीमा राखिएर गरिएको छ भन्ने भ्रमबाट मुक्त हुन पनि आग्रह गर्न चाहन्छु ।’
केही समय अगाडि रास्वपाका सांसद स्वर्णिम वाग्लेले नेपाली कांग्रेसले रवि लामिछानेलाई प्रधानमन्त्रीको अफर गरेको बताएका थिए । बैठकमा शर्माले गृहमन्त्री रवि लामिछानेमाथि संसदीय छानबिन हुनुपर्ने बताए । कांग्रेसले गृहमन्त्री लामिछानेमाथि छानबिनका लागि संसदीय समिति गठनको माग गर्दै आएको छ ।