पोखरासँग भगेनी सम्बन्ध जोडेको यिपिनमा उपराष्ट्रपति (फोटोफिचर)
तस्बिर : उपराष्ट्रपतिको सचिवालय
काठमाडौँ, ६ असोज । चीन भ्रमणमा रहेका उपराष्ट्रपति नन्दबहादुर पुनले सिचुवान प्रान्तको यिपिन क्षेत्रको भ्रमण गरेका छन् । उनले शनिबार विभिन्न विश्वविद्यालय, मोबाइल उत्पादक कम्पनीको अवलोकन भ्रमण गरेका हुन् ।
यिपिन पोखरासँग यही असोज १ गते भगेनी सम्बन्धमा जोडिएको चिनियाँ शहर हो । ५५ लाख ६० हजार जनसङ्ख्या भएको यिपिनलाई ‘रक्सी र बाँसको शहर’ भनेर चिनिन्छ । उपराष्ट्रपतिले बिहान सिचुवान युनिभर्सिटी एण्ड इञ्जिनीयरिङको भ्रमण गरे । भ्रमणको क्रममा उनलाई विश्वविद्यालयमा अध्ययनरत नेपाली विद्यार्थीले स्वागत गरेका थिए ।
१) यिपिनमा रहेको सिचुवान यूनिभर्सिटी एण्ड ईन्जिनियरिङको भ्रमणको क्रममा नेपाली विद्यार्थीहरुसँग भेट्घाट गर्नुहुँदै उपराष्ट्रपति । सो विश्वविद्यालयमा १७ जना नेपाली विद्यार्थी छन् ।
नेपाली विद्यार्थीसँग संक्षिप्त अन्तरक्रिया गर्दै उपराष्ट्रपतिले विश्वविद्यालयमा उत्कृष्ट नतिजा ल्याएर नेपालको शीर उँचो राख्न आग्रह गरेको उपराष्ट्रपतिको प्रेस संयोजक मनोज घर्तीले जानकारी दिए । उनले यिपिन नगरका चिनियाँ कम्युनिस्ट पार्टी (सिपिसी)का सचिवले सिचुवान युनिभर्सिटीमा अध्ययनरत नेपाली विद्यार्थी उत्कृष्ट रहेको बताउँदै थप प्रगतिका लागि शुभकामना दिए ।
याङसी नदिमा बनेको बन्दरगाहाको अवलोकन भ्रमण गर्दै उपराष्ट्रपति ।
विश्वविद्यालयमा अध्ययनरत नेपाली विद्यार्थीले आफूहरूले उत्कृष्ट नतिजा ल्याउन कोशिस गरिरहेको बताए । विश्वविद्यालयका अन्तर्रा्िष्ट्रय विद्यार्थी एशोसिएसनका अध्यक्ष सुरजले आफूहरुले राम्रो गरिरहेको बताए ।
आधुनिक चीनका भवन निर्माण डिजाईनका बुवा मानिने लियाङ सिछङको निवासको अवलोकन भ्रमण गर्दै उपराष्ट्रपति ।
उपराष्ट्रपतिले लिनकाङ आर्थिक क्षेत्रमा रहेको डोब मोबाइल र लिगो मोबाइल उत्पादन उद्योगको अवलोकन भ्रमण गरे । उनले चीनको सबैभन्दा लामो नदी याङसीमा बनेको यिपिन बन्दरगाहको समेत अवलोकन भ्रमण गरे ।
लिनकाङ आर्थिक क्षेत्रमा रहेको प्रविधियुक्त सामाग्री र लिगो मोबाईल उत्पादन उद्योगको अवलोकन भ्रमण गर्दै उपराष्ट्रपति ।
उपराष्ट्रपतिले आज नै आधुनिक चीनका भवन निर्माण डिजाइनका बुवा मानिने लियाङ सिछङको निवासको अवलोकन भ्रमण गरे । लियाङ चीन जापान युद्धको बेला बेइजिङबाट याङसी नदीको किनारमा रहेको लिच्वाङमा आएर बसेका थिए । उनले त्यहीँ बसेर आधुनिक चीनको भवनको डिजाइन गरेका थिए ।