नाराबाजी र विरोधका बीच शहिदकाे नाममा गाउँपालिकाको नाम फेरियो


प्रकाशित मिति : December 28, 2017

रोल्पा : गाउँपालिकाको नाम परिवर्तन गर्ने विषयमा जनताको व्यापक असन्तुष्टि र नाराबाजी हुन थालेपछि रोल्पाको एक गाउँपालिकाले प्रहरी घेराबीच बैठक सम्पन्न गरी नाम समेत परिवर्तन गरेको छ ।

पूर्वी रोल्पाको सुवर्णावती गाउँपालिकाका बहुमत जनप्रतिनिधिको बैठकले सो नाम परिवर्तन गरी शहीद सुनिल स्मृति गाउँपालिका नामाकरण गरेको हो । बैठकमा गाउँपालिकाका अध्यक्ष गुणेन्द्र घर्तीले नाम परिवर्तनको प्रस्ताव गरेसँगै १९ जना सदस्यले विरोध जनाउँदै बैठक बहिष्कार गरेर निस्किएको बताइएको छ ।

४४ सदस्यीय गाउँसभामा १९ जनप्रतिनिधिले नाम परिवर्तनको निर्णयमा असहमति जाहेर गरेका छन् ।

प्रस्तावप्रति व्यापक असन्तुष्टि र विरोध जाहेर गर्दागर्दै पनि सुनुवाइ नभए पछि बाहिर निस्कनुको विकल्प भएन वडाध्यक्ष गंज क्षेत्रीले बताए । हाम्रो बहिष्कारपछि सामान्य बहुमतको आधारमा निर्णय भएको आफूले जानकारी पाएको क्षेत्रीले बताए।

गाउँपालिका बाहिर जनताको व्यापक विरोध र नाराबाजी हुँदा ठूलो संख्यामा प्रहरी परिचालन गरेर बैठक गरी नाम परिवर्तनको निर्णय गरेको क्षेत्रीले आरोप लगाए । लोकतन्त्रमा अल्ममतको पनि कदर हुने भएपनि उहाँहरुले कसैको कुरा नसुनेर निरंकुश शैलीमा निर्णय गर्नुभयो, क्षेत्रीले भने ।

उता गाउँपालिकाका अध्यक्ष गुणेन्द्र घर्तीले भने सर्वसम्मत हुन नसकेको विषय अल्पमत, बहुमतमा टुंग्याउने विषय भएकाले कानूनको शासन र लोकतन्त्रको मर्मअनुसार गाउँपालिकाको नाम परिवर्तन गरेको बताए ।

नाम परिवर्तनको विषयले शहीदको स्मृति र सम्मानसमेत भएकाले अधिकांश जनप्रतिनिधि र जनताले समर्थन गरेको अध्यक्ष घर्तीले प्रतिक्रिया दिए ।स्थानीय बासिन्दा र माओवादी केन्द्र बाहेक अन्य दलका नेता कार्यकर्ताले पनि गाउँसभाको बाहिर विरोध प्रदर्शन भएको थियो रोल्पामा ७ वटामा माओवादी, २ वटामा एमाले र एकमा कांग्रेसले जितेको थियो ।

प्रतिक्रिया दिनुहोस्