१५ सय कैदीको भीडमा दिन काट्दै आलम, सँगैका कैदीसँग गर्छन् यस्तो गुनासो
काठमाडौं, २ मंसिर । रौतहटको राजपुर बमकाण्डका आरोपी नेपाली कांग्रेसका नेता तथा संघीय सांसद मोहम्मद आफताब आलमलाई हाल राजधानीको नख्खु कारागारमा १५ सय कैदीसँगै राखिएको छ ।
रौतहट जिल्ला अदालतले पुर्पक्षका लागि जेल चलान गर्ने आदेश दिएलगत्तै आलमलाई रातारात नख्खु कारगार ल्याइएको थियो । नख्खु कारागार प्रशासनले आलमलाई सामान्य कैदीलाई जसरी नै राखिएको जनाएको छ । नख्खु कारागारका प्रमुख सुरेन्द्र पौडेल आलमलाई कुनै अतिरिक्त सेवा सुविधा नदिइएको बताउँछन् ।
‘यो कारागारमा १५ सय कैदीबन्दी छन् । तीमध्ये आलम पनि एक हुन् । सामान्य कैदीलाई जसरी राखिन्छ, त्यसरी नै राखिएको छ,’ कारागार प्रमुख पौडेलले भने । मधुमेहका रोगी उनले कारागारमै सुई लिने गरेका छन् । यस्तै कोहीसँग बोल्नु परे आफूलाई ष्ड्यन्त्र गरेर फसाइएको गुनासो गर्छन् । राजधानी दैनिकबाट
