कलेजको बस दुर्घटना हुँदा एकको मृत्यु, ११ विद्यार्थी घाइते
मोरङ, ९ माघ । मोरङको रङ्गेलीमा कलेज बस पल्टिँदा एक जनाको ज्यान गएको छ । दुर्घटनामा ११ विद्यार्थी घाइते भएका छन् ।
बिहीबार बिहान साढे ६ बजेतिर लर्डबुद्ध कलेजका विद्यार्थी बोकेको मे १ ख १४९० नम्बर बस दुर्घटनामा परेको हो । दुर्घटनामा परी सहचालक समेत रहेका बसधनी विराटनगर–१५ का ३२ वर्षीय सानु साहको मृत्यु भएको प्रहरीले जानकारी दिएको छ ।
घनपालथान गाउँपालिका–४ रामचोकमा अनियन्त्रित भएर बस पल्टिँदा ११ जना विद्यार्थी घाइते छन् । उनीहरूको अवस्था सामान्य रहेको प्रहरीले जनाएको छ ।
दुर्घटनापछि फरार रहेका बसका चालक विराटनगर १० का खिलबहादुर खड्कालाई प्रहरीले पक्राउ गरेको छ । बाक्लो हुस्सु लागेकाले विपरीत दिशाबाट आउँदै गरेको सवारी टाढैबाट देख्न नसक्दा बस अनियन्त्रित भई पल्टेको खड्काले बयानमा बताएका छन् ।