थलिएको फुटबललाई फेरि उठाउन फिफाको यस्तो नयाँ योजना
काठमाडौं, २६ चैत । कोराना भाइरसको संकटबाट थलिएको फुटबललाई माथि उकास्न विश्व फुटबल महासंघ फिफाले नयाँ योजना बनाएको छ ।
जसअनुसार खेलाडीको सम्झौताको मिति अर्थात ‘ट्रान्सफर विन्डो’लम्ब्याउने र अर्को सिजनको फुटबल तालिका सुरु गर्ने समय पनि तय गरिएको छ । फिफाले हाल कोरोना भाइरसका कारण बन्द रहेको फुटबललाई नियमित तरीकाले अगाडी बढाउन खेलाडीसँगको अनुबन्धको मिती लम्ब्याउने भएको छ ।
प्रायः सबै शीर्ष लिगमा जुनको अन्तिममा खेलाडीसँगको सम्झौता सकिने भएकाले त्यो मिति लम्ब्याउने भएको छ । अर्को सिजनका लागि नयाँ सम्झौताको मिति पनि पछाडी सारिनेछ । यसका साथै यदि खेलाडी एउटा क्लवबाट अर्को क्लवमा गएमा पुरानो क्लवसँगको सम्झौता सकिनु अगाडि नै नयाँ क्लवबाट खेल्न सक्ने भएका छन् ।
आर्थिक अभावका कारण क्लवले खेलाडीको तलब नियमित दिन नसक्ने अवस्थामा पनि दुवै पक्षलाई मिलेर अगाडी जान भनिएको छ ।
दुवै पक्ष निचोडमा पुग्न नसकेको अवस्थामा फिफाको ‘डिस्प्युट रिजलुसन चेम्बर’ले क्लवको आर्थिक स्थितिका बारेमा अध्ययन गर्नेछ । गैरखेलाडी कर्मचारीलाई आर्थिक हिसाबले कठिन भएमा विकल्पका रुपमा बिमा योजना अगाडि सारिँदैछ ।
कोरोनाको संकटको बेला कुनै पनि खेलाडीको सम्झौता सकिएको भएमा उसले नयाँ सम्झौता कुनैपनि क्लवसँग गर्न सक्नेछ । एजेन्सी
