ललितपुरमा हिरासतभित्रै आत्महत्या
ललितपुर, १७ असार । प्रहरी परिसर ललितपुरमा रहेका एक जना थुनुवाले आत्महत्या गरेका छन् ।
सिराहको औराहीका दुर्गेस यादवले बुधबार बिहान आत्महत्या गरेका हुन् । उनी जबरजस्ती करणीको मुद्दामा पक्राउ परेको ललितपुरका प्रहरी प्रमुख एसएसपी टेकप्रसाद राईले जानकारी दिएका छन् ।
पक्राउपछि उनलाई हिरासतभित्रै क्वारेन्टिनमा राखिएको थियो । उनले तन्नाको पासो लगाएर बाथरुममा झुण्डिएर आत्महत्या गरेका एसएसपी राईले जानकारी दिए ।
बाथरुममा झुण्डिएको अवस्थामा फेला परेपछि उनलाई प्रहरीले तत्काल पाटन अस्पताल लगेको थियो । अस्पतालले उनलाई केहीबेर अघि मृतक घोषणा गरेको हो ।
