‘खिचडी’ जस्तो संवैधानिक व्यवस्थाका कारण नेकपाभित्र संकट : प्रभु साह
गौर, १४ साउन । नेपाल कम्युनिष्ट पार्टी (नेकपा) का नेता तथा सांसद प्रभु साहले संवैधानिक व्यवस्थामा रहेको त्रुटीका कारण पार्टीभित्र संकट उत्पन्न भएको बताएका छन् ।
रौतहटमा आज आयोजित कार्यकर्ता भेलालाई सम्बोधन गर्दै नेकपा प्रदेश–२ का अध्यक्ष समेत रहेका नेता साहले सम्झौताको आधारमा निर्माण भएको संविधानमा समावेश गरिएका कतिपय समय र सिद्धान्त विपरीत व्यवस्थाकै कारण नेकपामा नेतृत्व तहमा विवाद सिर्जना भएको बताए ।
‘अहिले जुन संविधान छ, यो सम्झौताको बलमा तयार भएको संविधान हो । संविधानमा कतिपय ठाउँमा आवश्यकता भन्दा विपरीत ध्रुवको व्यवस्था पनि समावेश भएको छ जसले गर्दा यो संविधानमा अपूर्ण छ । त्यही अपूर्णता कारण आज हाम्रो पार्टीमा संकट उत्पन्न भएको हो ।’
अध्यक्ष साहले भने, ‘अहिलेको संविधानले न त कम्युनिष्ट सिद्धान्त बोकेको छ न त कांग्रेसकै, समग्रमा भन्ने हो भने हालको संवैधानिक व्यवस्था खिचडी जस्तो भएको छ । र पार्टीभित्र देखिएको विवाद त्यही त्रुटीपूर्ण व्यवस्थाको उपज हो ।’
राजनीतिक स्थिरता र निरन्तर विकासका लागि संविधानमा रहेको त्रुटी सच्याउनुपर्ने नेता साहको भनाई थियो । साथै नेता साहले पार्टी एकताका पक्षमा उभिन र सहमतिका आधारमा अगाडि बढ्न नेताहरुलाई दबाब दिन कार्यकर्ता अगाडि आउनुपर्ने बताए ।
