इसाई धर्मगुरु पोप फ्रान्सिसले गरे हिंसा र अतिवाद अन्त्यको आह्वान
काठमाडौं, २२ फागुन । इसाई धर्मगुरु पोप फ्रान्सिसले हिंसा र अतिवाद अन्त्यको आह्वान गरेका छन् । कोरोना महामारी पछिको पहिलो विदेश भ्रमणका क्रममा इराक पुगेका पोपले यस्तो आह्वान गरेका हुन् ।
इराकी राष्ट्रपति बरहाम सालिहको स्वागत पछि बोल्दै पोपले हतियारको संघर्ष शान्त हुने विश्वास लिंदै चाँडै नै हिंसा अन्त्य हुने आशा व्यक्त गरे । इराकको विविधता महत्वपूर्ण स्रोत भएको भन्दै उनले इसाईहरुको महत्वपूर्ण भूमिका रहेकोमा जोड समेत दिए ।
पोप फ्रान्सिसले तीन दिने इराक भ्रमणका क्रममा इराकी अधिकारीहरु र इस्लाम धर्मगुरुसँग भेटघाट गर्ने कार्यक्रम रहेको छ । उनले इराकमा सदियौंदेखि रहेबसेका इराकी इसाई धर्मावलम्बीहरुका दुःख पीडाका बारेमा छलफल गर्ने भ्याटिकनले जनाएको छ ।
पोप फ्रान्सिसले इराकका शिते धर्मगुरु ग्रान्ड आयातोल्लाह अलि सिस्तानीसँग भेटवार्ता गर्नेै कार्यक्रम छ । इराक भ्रमणका क्रममा ८४ वर्षिय पोप फ्रान्सिसलाई सुरक्षा प्रदान गर्न करिब १० हजार इराकी सुरक्षकर्मी परिचालन गरिएको छ । एजेन्सी
