भेरी अस्पतालमा कैलालीका कोरोना संक्रमितको मृत्यु
बाँके, १ बैसाख । बाँकेको नेपालगञ्जस्थित भेरी अस्पतालमा एक कोरोना संक्रमितको ज्यान गएको छ । कैलालीको लम्कीचुहा नगरपालिका–१ का ३७ वर्षीय पुरुषको उपचारका क्रममा मंगलबार राति ९ः५० बजे मृत्यु भएको बाँकेका कोरोना फोकल पर्सन तेज ओलीले जानकारी दिए ।
स्वास्थ्यमा समस्या आएपछि चैत ३० गते पीसीआर परीक्षण गरिएकोमा सोही दिन उनको रिपोर्ट पोजेटिभ आएको थियो । कोरोना संक्रमण पुष्टि भएसँगै भेरी अस्पतालको कोभिड विशेष वार्डमा भर्ना गरिएको उनको उपचारको क्रममा मंगलबार राति मृत्यु भएको उनले बताए ।
ओलीका अनुसार योसँगै बाँकेमा बाहिरी जिल्लाबाट उपचारका लागि आएका ९२ जनाको कोरोना संक्रमणका कारण मृत्यु भएको छ ।