नारायणगढ–मुग्लिन सडक खण्ड एकतर्फी खुल्यो
चितवन, २५ असार । चितवन भरतपुर महानगरपालिका–२९, सेतीदोभानमा खसेको पहिरो पन्छाएसँगै सवारी आवागमन पुनः सञ्चालन भएको छ ।
बुधबार राति १० बजेदेखि पहिरोका कारण अवरुद्ध नारायणगढ–मुग्लिन सडक आज बिहान ५ः३० देखि एकतर्फी सञ्चालनमा आएको हो ।
जिल्ला प्रहरी कार्यालय चितवनका अनुसार पहिरो पन्छाएसँगै रोकिएका सवारीसाधनहरु गन्तव्यतर्फ लागेका छन् ।
सो स्थानमा वर्षा सुरु भएसँगै पटक–पटक पहिरो खसेर सडक अवरुद्ध हुँदै आएको छ । एक साताभन्दा बढी समयदेखि सो ठाउँमा पटक–पटक पहिरो खसेर दुःख दिइरहेको छ । पानी परेलगत्तै पहिरो खस्ने समस्या छ । रासस
