विपक्षीको विरोधपछि गण्डकी प्रदेश सभा स्थगित
पोखरा, २७ असार । भर्खरै सत्ताबाट बाहिरिएको नेकपा एमाले आक्रामक बन्दा गण्डकी प्रदेश सभा बैठक स्थगित भएको छ । कृष्णचन्द्र नेपालीले मुख्यमन्त्रीको रुपमा विश्वासको मत प्राप्त गरेपछि स्थगित भएपछि बजेटबारे छलफल गर्न आइतबार शुरु भएको बैठकमै विपक्षीहरु सत्ता पक्षप्रति आक्रामक बनेका हुन् ।
बैठकको शुरुमै प्रतिपक्षी दलका नेता तथा पूर्वमन्त्री रामशरण बस्नेतले नयाँ सरकारले आफ्ना कार्यकर्ताहरुलाई विभिन्न योजनाको नाममा रकम बाँडेको आरोप लगाउँदै त्यसको सत्य तथ्य बाहिर नल्याएसम्म सदन चल्न नदिने जानकारी गराएका थिए ।
कृष्णचन्द्र नेपाली सरकारले आफ्ना कार्यकर्तालाई १६ करोडभन्दा बढी गैरबजेटरी रकम बाँडेर आर्थिक अनियमितता गरको विपक्षीको आरोप छ । विपक्षीको विरोधपछि सभामुख नेत्रनाथ अधिकारीले दिउँसो १ बजेसम्मको लागि अधिवेशन स्थगित गरेका छन् ।
