तेजावपीडित आरतीलाई प्रदेश–२ सरकारको पाँच लाख सहयोग
जनकपुरधाम, १० भदौं । पतिले तेजाव हानेर घाइते भएकी जनकपुरकी आरती साहलाई प्रदेश २ सरकारले पाँच लाख रुपैयाँ आर्थिक सहयोग गरेको छ । मुख्यमन्त्री मोहम्मद लालबाबु राउत र समाजिक विकास मन्त्री नवल किशोर साहले बिहीबार बिहान तेजाव पीडित आरतीलाई पाँच लाख रुपैयाँको चेक प्रदान गरेका हुन् ।
गत १९ कात्तिकमा दीपावलीको दिन जनकपुरधाम उपमहानगरपालिका–७ स्थित ससुराली पुगेका सञ्जीव साहले पेठिया बजारमा श्रीमती आरती साह र छोरी रियामाथि तेजाव प्रहार गरेका थिए ।
सो घटनामा जिल्ला अदालत धनुषाले यसअघि उनलाई दोषी ठहर गरेको थियो । यसै घटनामा तेजाव बेच्ने नागेन्द्र साहलाई भने अदालतले सफाइ दिएको थियो । घटनापछि सरकारी वकिलको कार्यालयले जिल्ला अदालत धनुषामा आरतीका श्रीमान् र तेजाव बेच्ने नागेन्द्र साहमाथि १५ वर्ष ६ महिनाको सजाय माग गर्दै अभियोग पत्र दर्ता गराएको थियो ।
दुवै जनाविरुद्ध अंगभंग, कुरुप र एकीकृत गरी तीन वटा कसुरको सजायका लागि मागदाबी गरिएको थियो । तेजाव आक्रमणबाट आरतीको दाहिने आँखा गुम्नुका साथै घाँटी, छाती, स्तनलगायतका अंग कुरुप बनेको छ । तेजाव आक्रमणमा परी उनकै छोरी रियाको दाहिने हात र टाउकोमा खत बसेको थियो ।
