भोलि मन्त्रिपरिषद विस्तार हुन्छ : प्रवक्ता महरा
काठमाडौं, ६ असोज । नेकपा (माओवादी केन्द्र) का प्रवक्ता कृष्णबहादुर महराले भोलि (बिहीबार) मन्त्रिपरिषद विस्तार हुने बताएका छन् ।
आज (बुधबार) स्थायी कमिटीको बैठकपछि पत्रकारहरूलाई जानकारी दिंदै प्रवक्ता महराले केहीबेरमा सत्ता गठबन्धनको बैठक बस्न लागेको भन्दै बिहीबार मन्त्रिपरिषद् विस्तार हुने बताए ।
‘अहिले केहीबेरमा गठबन्धनका नेताहरू बस्दै हुनुहुन्छ, त्यो बैठकले सरकार सञ्चालन निर्देशिका पारित गर्नेछ’, उनले भने, ‘त्यसपछि भोलि मन्त्रिपरिषद् विस्तार हुन्छ ।’
बुधबार सत्ता गठबन्धनमा रहेका दलका शीर्ष नेताको बैठक बस्ने र त्यसले मन्त्रालय भागवण्डा टुंग्याउने महराले जानकारी दिए । ‘अध्यादेशको कारणले डिले भएको थियो । अब त्यो काम करिब करिब सिद्धियो । आज र भोलिसम्म सरकार विस्तारको काम सिद्धिन्छ’ महराले भने ।
उनले राजनीतिक दलसम्बन्धी अध्यादेशका विषयमा पनि गठबन्धनका नेताहरूले नै निर्णय लिने जानकारी दिएका छन् । ‘अध्यादेश खारेजीको कुरा आइरहेको छ, भोलि नै पार्लियामेन्ट छ, त्यहाँ प्रतिस्थापन विधेयक पनि जानसक्छ’, महराले सुनाए, ‘त्यसपछि विधेयक विषयमा सबै दलको राय समान हुन्छ ।’
