कपिलवस्तु कृष्णनगरमा फैलिएको झाडापखाला अझै नियन्त्रणमा आएन
कपिलवस्तु, ३१ असोज । कपिलवस्तुको कृष्णनगरमा फैलिएको झाडापखाला संक्रमितमध्ये १० जना अझै संक्रमणमुक्त भएका छैनन् ।
जिल्लाको कृष्णनगर नगरपालिकाको ७, ८ र ९ मा असोज १८ गतेदेखि फैलिएको झाडापखाला तथा वान्ताबाट ८५१ जना संक्रमित भएका थिए । तीमध्ये शनिवारसम्म ८४१ जना निको भइसकेको र १० जना उपचाररत रहेको इपिडिमियोलोजी तथा रोग नियन्त्रण महाशाखाले जनाएको छ ।
संक्रमण फैलिएको क्षेत्रमा गत साता परीक्षण गरिएको पानीमा इकोली नामक जिवाणु फेला परेको थियो । झाडापखाला संक्रमणबाट सो क्षेत्रमा हालसम्म चार जनाको मृत्यु भइसकेको छ ।