रविन्द्र मिश्र पक्षको विधान संशोधनलाई निर्वाचन आयोगको वैधता
केन्द्रीय सदस्यको संख्या १२४ जना, पार्टीमा मिश्रको मात्र कार्यकारी अधिकार
काठमाडौं, १८ कार्तिक । निर्वाचन आयोगले विवेकशील साझा पार्टीको नयाँ विधान र केन्द्रीय समिति हेरफेर भएको विवरण वैधता दिंदै अद्यावधिक गरेको छ ।
आयोगको १७ गतेको निर्णयले पार्टीको विधान ‘विवेकशील साझा पार्टीको विधान २०७८’ र केन्द्रीय समितिमा हेरफेर भएको विवरण राजनीतिक दलसम्बन्धी ऐनअनुसार अद्यावधिक गरेको हो ।
गत कार्तिक ११ गते अध्यक्ष रवीन्द्र मिश्रको अध्यक्षतामा बसेको पार्टीको केन्द्रीय समितिको बैठकले दुई–तिहाइ भन्दा बढी मतका साथ पार्टीको नयाँ विधान पारित गरेको थियो । जसमा पार्टीको कार्यकारी अधिकार अध्यक्षमा निहीत रहने र संयोजकलाई दिइएको कार्यकारी अधिकार खोस्ने निर्णय गरेको थियो ।
उक्त बैठकले केन्द्रीय समिति सदस्यहरूको संख्या १२४ रहने पनि निर्णय गरेको थियो । पाँच जनाको राजीनामा र एक जनाको देहावसानका कारण पार्टीको केन्द्रीय सदस्यहरुको संख्या घटेको पार्टीका प्रवक्ता शरदराज पाठकले जानकारी दिएका छन् । निर्वाचन आयोगले अद्यावधिक गरेसँगै अबदेखि पार्टीमा अध्यक्ष रवीन्द्र मिश्रमा मात्र कार्यकारी अधिकार निहीत रहने छ ।
मिश्र पक्षले पार्टीको काम कारबाही अघि बढाउन अवरोध भएको भन्दै कार्यकारी अधिकार अध्यक्षमा मात्र निहीत गरेको हो । अध्यक्ष रवीन्द्र मिश्रले फरक मत राख्ने पार्टीका साथीहरूलाई विमति भए पनि केन्द्रीय समितिको अत्यधिक बहुमत र निर्वाचन आयोगको निर्णयलाई सम्मान गर्न आग्रह गरेका छन् ।
