पढ्दा-पढ्दै छात्रा बेहोस हुन थालेपछि विद्यालय बन्द
जाजरकोट, २४ मंसिर । जाजरकोट सदरमुकाममा रहेको त्रिभुवन माध्यमिक विद्यालयका छात्रा पठनपाठनको समयमा बेहोस हुन थालेपछि आइतबारसम्मका लागि विद्यालय बन्द गरिएको छ ।
विद्यालयमा ६ देखि १० कक्षासम्म अध्ययन गर्ने छात्राहरु पठनपाठनकै समयमा केही दिनयता अकस्मात बेहोस हुने, चिच्याउने, रुनेलगायतका गतिविधि गर्न थालेपछि विद्यालय नै बन्द गर्नु परेको प्रधानाध्यापक भक्तबहादुर मल्लले जानकारी दिए ।
बिहीवार १० भन्दा धेरै छात्रामा त्यस्तो समस्या देखिएपछि चिकित्सकको सल्लाहमा आइतबारसम्म विद्यालय बन्द गरिएको प्रधानाध्यापक मल्लले बताए । छात्राहरु केही बेर बेहोस् हुने कराउने गरेपछि आफै ठीक हुने गरेका छन् । केही समयपछि फेरी अरु छात्रालाई यस्तो समस्या देखिएपछि बिहीबार मध्यान्तरपछि विद्यालयको पठनपाठन बन्द गरिएको हो ।
केही दिनअघि विद्यालयको छात्रावासमा बस्ने १२ कक्षामा अध्ययनरत एक छात्राले आत्महत्या गरेकी थिइन् । डा.समीक्षा मल्लले छात्रामा देखिएको समस्या मास हिस्टेरिया भएकाले केही दिन विद्यालय बन्द गरेर सम्पर्क विच्छेद गरे विस्तारै समस्या आफै समाधान हुने बताइन् । रासस