महाधिवेशनमा करिब ६ करोड खर्च हुने
काठमाडौं, २५ मंसिर । नेपाली कांग्रेसको १४औं महाधिवेशन सम्पन्न गर्न ५ देखि ६ करोड रूपैयाँसम्म खर्च लाग्ने नेताहरूले अनुमान गरेका छन् । तोकिएको मितिमा महाविधेशन नटुंगिए यो खर्च अझै बढ्ने केन्द्रीय समितिले गठन गरेको आर्थिक समितिका सदस्यले बताएका छन् ।
नेपाली कांग्रेस आर्थिक समितिका सदस्य दीपक खड्काले १४औं महाधिवेशन सम्पन्न गर्न ५ देखि ६ करोड खर्च हुने अनुमान गरिएको बताए । ‘अहिलेसम्मको हाम्रो अनुमानमा ५ देखि ६ करोड रूपैयाँ खर्च हुनेछ,’ खड्काले भने, ‘तर महाधिवेशनको अवधि लम्बिँदै गए त्यहीअनुसार खर्च पनि बढ्दै जानेछ ।’ कांग्रेसका एक नेताका अनुसार एक दिन महाधिवेशनको तिथि लम्बियो भने ८० देखि ९० लाख रूपैयाँ खर्च बढ्छ । त्यस अनुसार एक दिनमात्रै महाधिवेशन लम्बियो भने महाधिवेशन सम्पन्न गर्न कुल खर्च ७ करोडसम्म पुग्ने ती नेताको भनाइ छ ।
महाधिवेशनका लागि छुट्याइएको ५ देखि ६ करोड रूपैयाँ महाधिवेशन प्रतिनिधिका लागि भोजन,आवास, मञ्च निर्माण, प्रचारप्रसारमा खर्च लाग्ने अनुमान गरिएको छ । मञ्च व्यवस्थापनमा मात्रै ४० लाख रूपैयाँ छुट्याइएको खड्काले जनाए । यसैगरी महाधिवेशन प्रतिनिधिलाई भोजन तथा आवासका लागि ३ करोड ५० लाख रूपैयाँदेखि ४ करोडसम्म खर्च लाग्ने अनुमान गरिएको छ ।
आवास तथा भोजन व्यवस्थापन समितिका संयोजक सुरेन्द्र पाण्डेले महाविधेशनको मिति लम्बिए आवास तथा भोजनमै ४ करोडभन्दा बढी खर्च लाग्ने बताए । आवास तथा भोजनको व्यवस्था गर्न पाण्डेको संयोजकत्वमा आवास तथा भोजन समिति गठन गरिएको छ ।
आर्थिक समितिका सदस्यले महाधिवेशनका लागि खर्चको जोहो भइसकेको जनाएका छन् । महाधिवेशनको पूर्वसन्ध्यामा बसेको नेपाली कांग्रेस केन्द्रीय समिति बैठकमा कोषाध्यक्ष सीतादेवी यादवले प्रस्तुत गरेको आर्थिक प्रतिवेदनमा कांग्रेसको खातामा १० करोड रूपैयाँ मौज्दात रहेको जनाइएको छ । यता नेपाली कांग्रेसको १४औं महाधिवशेनमा सहभागी प्रतिनिधिले छाकैपिच्छे दुई थरी मासु खान पाउने भएका छन् । महाधिवेशन प्रतिनिधिलाई शुक्रबारदेखि मंसिर २७ गतेसम्म बिहान लन्च,बेलुका डिनर, बिहान खाजा, दिउँसो चिया बिस्कुट खुवाउने व्यवस्था मिलाइएको छ । प्रत्येक महाधिवेशन प्रतिनिधिलाई होटलमा एउटा बेडको व्यवस्था मिलाइएको छ ।
महाधिवेशन प्रतिनिधिका लागि भोजन तथा आवासमा कुनै समस्या आएमा तत्काल समस्या समाधान गर्ने गरी ठमेल, सुन्धारा तथा गौशालामा ३ वटा छुट्टाछुट्टै फोकल टिम गठन गरिएको छ । ‘प्रतिनिधिहरूलाई आवास तथा भोजनमा कुनै समस्या आएमा तत्काल समस्या समाधान गर्न सकियोस्,’ पाण्डेले भने ।
उनका अनुसार फोकल टिममा २० देखि २५ जना कार्यकर्ता सहभागी छन् । महाधिवेशन प्रतिनिधिलाई स्वास्थ्य मापदण्ड पालना गर्ने गरी भोजन तथा आवासको व्यवस्था मिलाइएको आवास तथा भोजन समितिले जनाएको छ । देशभरबाट महाधिवेशन प्रतिनिधि बिहीबारदेखि काठमाडौं आउन सुरु गरेका छन् । उनीहरूका लागि भोजनको व्यवस्था मिलाउन अनुपम फुडल्यान्ड र दियालो फुडल्यान्डलाई जिम्मेवारी दिइएको छ ।
फुडल्यान्डका मालिक कृष्ण पौडेलका अनुसार महाधिवेशन प्रतिनिधिका लागि छाकै पिच्छे दुई थरी मासु खुवाउने व्यवस्था गरिएको छ । मटन, चिकेन र माछामध्ये प्रत्येक छाकमा दुई थरी मासुको व्यवस्था मिलाइएको पौडेलले जनाए । यसैगरी महाधिवेशनभर बिहानको खाजामा पुरी तरकारी, सेन्डविज, अन्डालगायत व्यवस्था मिलाइएको छ । नागरिक दैनिकबाट