एनआरएनए विवाद : प्रमुख निर्वाचन आयुक्त पौडेलले दिए राजीनामा
काठमाडौं, २५ मंसिर । गैरआवासीय नेपाली संघमा विवाद चर्किएपछि निर्वाचन समितिका प्रमुख निर्वाचन आयुक्त लिलामणि पौडेलले राजीनामा दिएका छन् ।
नेपाल बार एशोसिएसनका महासचिव समेत रहेका पौडेलले संघमा अध्यक्ष कुमार पन्तलाई राजीनामा बुझाएका हुन् । पौडेलको राजीनामासँगै कार्यवाहक निर्वाचन आयुक्तमा रामप्रताप थापालाई जिम्मेवारी दिइएको स्रोतले जानकारी दिएको छ ।
पछिल्ला घटनाक्रमले संघको डिसेम्बर २६ र २७ मा हुने भनिएको निर्वाचन झनै अन्योलमा परेको छ । संस्थापन पक्षले निर्वाचनको तयारी गरिरहेका बेला कुल आचार्य पक्षले भने निर्वाचनमा सहभागी हुने कुनै संकेत देखाएको छैन । प्रतिनिधि विवाद पहिले सुल्झाएर मात्रै निर्वाचन हुनुपर्ने आचार्य पक्षको माग रहेको छ ।