कास्की अन्नपूर्णमा अध्यक्ष-उपाध्यक्षमै एमाले विजयी
कास्की । कास्कीको अन्नपूर्ण गाउँपालिकाको अध्यक्ष र उपाध्यक्ष दुवै पदमा नेकपा (एमाले) का उम्मेदवार विजयी भएका छन् ।
स्थानीय तह सदस्य निर्वाचन २०७९ अन्तर्गत मतगणनाको आज बिहान जारी अन्तिम परिणामअनुसार एमालेका विष्णुबहादुर केसीले नेपाली कांग्रेसका युवराज कुँवरलाई ७६३ मतान्तरले पराजित गर्दै अध्यक्षमा विजयी भएका हुन् । नव निर्वाचित केसीले ६,७२२ मत ल्याउँदा कुँवरले ५,९५९ मत प्राप्त गरे । विसं २०७४ को निर्वाचनमा केसी निर्वतमान गाउँपालिका अध्यक्ष कुँवरसँग पराजित भएका थिए ।
उपाध्यक्षमा एमालेकै चन्द्रकला अधिकारी देवकोटाले ६,६०८ मतसहित विजयी भएकी छन् । उनका निकटम् प्रतिद्वन्द्वी कांग्रेसकी खेमकुमारी गुरूङले छ हजार १४ मत प्राप्त गरिन् । अन्नपूर्णका ११ वटा वडामध्ये १, ३, ६, ७, ९ र ११ वडामा एमाले र २, ४, ५, ८ र १० मा कांग्रेसले वडाध्यक्ष जितेको छ ।
जिल्लाका पाँच स्थानीय तहमध्ये हालसम्म तीन पालिकाको अन्तिम मत परिणाम आइसकेको छ । अन्नपूर्ण र रुपा गाउँपालिकाको अध्यक्ष, उपाध्यक्षसहित बहुमत वडाध्यक्ष एमालेले जितेको छ । कांग्रेस माछापुच्छ्रेको अध्यक्ष र उपाध्यक्षसहित सात वडाध्यक्षमा विजयी भएको छ । पोखरा महानगरपालिका र मादी गाउँपालिकाको मतगणना जारी छ । मादीमा कांग्रेस र पोखरामा गठबन्धनका उम्मेदवार नेकपा (एकीकृत समाजवादी) ले अग्रता लिएको छ ।
