सात विद्यार्थीमा कोरोना संक्रमण, विद्यालय बन्द
रुकुम पश्चिम । रुकुम पश्चिमको एक विद्यालयमा अध्ययनरत सात जना विद्यार्थीमा कोरोना भाइरस संक्रमण देखिएपछि एक हप्ताका लागि पठनपाठन बन्द गरिएको छ । त्रिवेणी गाउँपालिका–३ झुल्नेटामा रहेको श्री युवा जनजागरण माध्यमिक विद्यालय बन्द गरिएको हो ।
विद्यालयमा अध्ययनरत सात विद्यार्थीमा कोराना पोजेटिभ देखिएपछि एक हप्ताका लागि पठनपाठन बन्द गरिएको शिक्षक गणेश ओलीले जानकारी दिए । आज बुधवार २० जना विद्यार्थीको कोरोना परीक्षण गरिएको थियो । परीक्षण गरिएकामध्ये ३५ प्रतिशत विद्यार्थीमा कोरोना पोजेटिभ देखिएको हो ।
केही दिनयता दिनहुँजसो विद्यालयमा बिरामी हुने विद्यार्थीको संख्या बढ्न थालेपछि विद्यालयमै उनीहरूको स्वास्थ्य परीक्षण गरिएको थियो । दैनिक ५, ६ जना विद्यार्थी बेहोस हुने, काँप्ने र ढल्ने जस्ता समस्या आएकाले त्रिवेणी गाउँपालिका अस्पताल खारानेटाका ल्याब टेक्निसियन भरत बिसीसहितको टोली बोलाएर जाँच गरिएको विद्यालयका प्रधानाध्यापक कृष्णा खड्का ओलीले जानकारी दिए ।
विद्यार्थीमा कोरोनाको संक्रमण दर बढ्न सक्ने भएकाले एक हप्ताका लागि विद्यालय बन्द गरिएको प्रधानाध्यापक खड्काले बताएका छन् । विद्यालयको प्रशासनिक काम भने हुनेछ । विद्यालयमा झण्डै सात सय विद्यार्थी अध्ययनरत छन् ।